Ինչո՞վ են վտանգավոր յուղազերծ մթերքները

Յուղազերծ մթերքները՝ հակառակ տարածված կարծիքի, վնասակար են։ Նման կարծիք է հայտնել սննդաբան Սվետլանա Զելենցովան (Ռուսաստան)։

ՌԻԱ Նովոստիին տված հարցազրույցում մասնագետը նշել է, որ յուղազերծ մթերքնեի մեծ մասը պարունակում է համի ուժեղացուցիչներ, որոնք կարող են վնասակար լինել առողջության համար։ Դրանցից են օսլան, հիդրոգենացված բուսական ճարպերը, բուրավետիչները, գունավորիչները եւ այլ միացություններ։

«Որքան ավելի շատ է մթերքը մշակվում արդյունաբերական ճանապարհով, այնքան ավելի քիչ օգտակար է եւ հաճախ ավելի կալորիական»,-ասել է Զելենցովան։

Սննդաբանը հիշեցրել է, որ ճարպերն անհրաժեշտ են մարդու օրգանիզմին։ Եթե ​​սննդակարգում նկատվում է ճարպերի պակաս եւ գերակշռում են ածխաջրերը, դա ժամանակի ընթացքում կառաջացնի նյութափոխանակության բազմաթիվ խնդիրներ: Բացի այդ, ճարպերի կրճատման ժամանակ օրգանիզմը ստանում է ավելի քիչ ճարպալուծվող վիտամիններ, ինչպիսիք են D, A, E: Կալցիումի կլանման համար անհրաժեշտ են նաեւ ճարպեր, որոնց պակասը նույնպես հղի է առողջական խնդիրներով: