Ի՞նչ է արել նիկոլի կառավարությունը Հայաստանին քովիդի համար փոխանցված 100 միլիոն եվրոյի հետ

ԵՄ-ը կորոնավիրուսի հետ կապված անցած տարի Հայաստանին է տրամադրել ավելի քան 100 մլն եվրոյի օգնություն։ Այս մասին հուլիսի 9-ին Երեւանում ասել է ԵՄ եվրոպական հարեւանության ընդլայնման եւ քաղաքականության հարցերի հանձնակատար Օլիվեր Վարհեն։

«Այժմ աշխատում ենք, որպեսզի ընդլայնենք առողջապահության ոլորտի հնարավորությունները, այդ թվում պատվաստման հարցով, որպեսզի ավելացվի տրամադրվող օգնությունը։ Համավարակը չի ավարտվի, քանի դեռ չեն պատվաստվել բոլորը»,- նշել է նա։

Նրա խոսքով՝ Հայաստանն այլեւս ժամանակ կորցնելու տնտեսական հնարավորություններ չունի, եւ պետք է, որպեսզի բոլորը պատվաստվեն։

«ԵՄ-ը շարունակում է մնալ Հայաստանի կարեւորագույն գործընկերը։ Բարձր եմ գնահատում բարեփոխումների իրականացումը։ Մենք հույս ունենք, որ Հայաստանում ընտրություններից հետո կձեւավորվի ուժեղ խորհրդարանական մեծամասնություն, որովհետեւ մենք առջեւում մեծ աշխատանք ունենք։ Այցի հիմնական նպատակը հետքովիդային ներդրումային ծրագրին մեկնարկ տալն է Հայաստանի տնտեսության վերականգնման ուղղությամբ՝ տնտեսության աճի արագացված ապահովման եւ աշխատատեղերի ավելացման նպատակով»,- ավելացրել է Վարհեն։