Ինչով է զբաղված Փաշինյանը եւ ինչ եղավ կենցաղային տեխնիկայի գործարանի հետ

ՀՀ վարչապետ Նիկոլ Փաշինյանը հերթական տեսանյութն է հրապարակել facebook-ի իր էջում, որտեղ ներկայացնում է, թե ինչ է կառուցվելու Արմավիրի մարզում այս տարի:

Մասնավորապես, նշվում է, որ հիմնանորոգվում է Երեւանյան փողոցի հանրապետական նշանակության ավտոճանապարհի 2.07 կմ հատվածը: Այն վերջին անգամ հիմնանորոգվել է մոտ 30 տարի առաջ:

Հիմնանորոգվում է նաեւ Նալբանդյան-Գետաշեն եւ Նոր Կեսարիա ճանապարհի 3 կմ հատվածը:

Համաձայնեք, եթե վարչապետը հարկ է համարում մի քաղաքի 2 կմ հատվածի ասֆալտապատման մասին գրառում անել, ապա ՀՀ քաղաքացին կարող է եզրակացնել, որ գործերը, մեղմ ասած, հեչ լավ չեն:

Նույն ՀՀ քաղաքացին Փաշինյանից ակնկալում է պարզաբանում, թե ինչ եղավ նույն Արմավիրի Մերձավան համայնքի կենցաղային տեխնիկայի գործարանի հետ, որի բացմանը մասնակցեց 2018-ի դեկտեմբերին: Ի՞նչ եղավ 4,5 միլիոն ներդրման եւ ութսուն աշխատատեղի եւ 126 հազար միավոր տեխնիկայի հետ, որը պետք է արտադրվեր ընդամենը մեկ տարում: Իսկապես, ո՞ւր են հայկական հեռուստացույցները, որ բյուջեն լցնելու համար Փաշինյանը հույսը դրել է գյուղացու սիգարետի եւ օղու վրա:

Իսկ ինչ վերաբերում է ասֆալտապատմանը, ապա այն միշտ էլ եղել է, լավ, թե վատ, դա արդեն այլ հարց է:

Վարդան Մխիթարյան

Top-News.am