Անչափ կարեւոր իրադարձություն. Պապիկյանն այցելել է ասֆալտի գործարան

Հայաստանում տնտեսությունն այն աստիճան խայտառակ վիճակում է, որ նախարարի այցը ասֆալտի գործարան համարվում է իրադարձություն, այդ մասին թողարկվում են մամուլի հաղորդագրություններ, լրատվամիջոցներն էլ անպայման հրապարակում են այդ տեղեկությունը:

Այո, մեծ իրադարձություն է եղել. ՏԿԵ նախարար Սուրեն Պապիկյանն այցելել է Արամուսում գործող ասֆալտի գործարան։ Այս մասին տեղեկանում ենք նաեւ նախարարի ֆեյսբուքյան էջից:

«Այց Բազալտե քարի հանքավայր Արամուսում եւ ասֆալտի գործարան առաջիկա լայնածավալ ասֆալտապատման աշխատանքներին ընդառաջ:

Շնորհիվ նորագույն տեխնոլոգիաների այս ասֆալտգործարանը ունի առավել որակյալ և էկոլոգիապես մաքուր արտադրողականություն, կարողանում է ժամում արտադրել 240 տոննա ասֆալտ նախկին 50 տոննայի փոխարեն»,- գրել է նա:

Իսկապես հրաշք: 21-րդ դարի երկրորդ տասնամյակն է ավարտվում, իսկ նախարարը զարմանում է, որ Հայաստանում ասֆալտի գործարան կա, եւ որ անգամ ճանապարհներն ասֆալտապատվելու են: 

Այսպես շարունակվելու դեպքում մի օր էլ ՏԿԵ նախարարը ֆեյսբուքյան էջում կգրի. «Բացեցի ծորակը, այնտեղից ջուր եկավ, ի դեպ, աշխարհում երկրորդ տեղն է զբաղեցնում: Այս ջրով մենք կոմպոտներ ենք արտադրելու, թան եւ անգամ լիմոնադ»: Հետո մի օգտատեր, գուցե վրացի, կգրեր. «Իսկ առաջին տեղում որ քաղաքի ջուրն է՝ Իջեւանի՞»: Եւ այստեղ Պապիկյանը համեստաբար կգրեր՝ ոչ, Սան Ֆրանցիսկոյի:

Այնպիսի տպավորություն է, որ Պապիկյանը հավատում է, որ մինչ իրենց իշխանության գալը Հայաստանում ոչ ասֆալտ են արտադրել, ոչ ճանապարը կառուցել, ոչ շենքեր կառուցել: 

Աննա Բաղդասարյան

Top-News.am