Ռուսաստանաբնակ գործարար Ալբերտ Ավդոլյանը գնել է աշխարհում ածխի խոշորագույն հանքավայրերից մեկը

Ռուսաստանաբնակ հայազգի գործարար Ալբերտ Ավդոլյանի «Ա-Պրոպերտի» («А-Проперти») ընկերությունը Ռուսաստանի առաջատար «Մեչել» («Мечел») հանքարդյունաբերական ընկերությունից ձեռք է բերել Յակուտիայում գտնվող Էլգայի ածխահանքը: Այս մասին տեղեկացնում է vedomosti.ru կայքը:

Ալբերտ Ավդոլյանի «Ա-Պրոպերտի» ընկերության կառույցները ձեռք են բերել «Էլգա ճանապարհ» («Эльга-дорога»), «Մեչել Տրանս Արևելք» («Мечел Транс Восток») և «Էլգաածուխ» («Эльгауголь») ՍՊԸ-ների 51%-ը 89 միլիարդ ռուբլիով` ներառյալ արժեթղթերի հսկիչ փաթեթի համար պարգևը: Գնորդը նաև ամբողջությամբ մարել է «Մեչել»-ի՝ ВЭБ.РФ-ին ունեցած 107 մլն դոլարի պարտքը:

Ողջունելով գործարքը՝ Ալբերտ Ավդոլյանը հայտարարել է, որ այն կդառնա Յակուտսկի վառելիքաէներգետիկ ընկերությունը ներառող արդյունաբերական կլաստերի ձևավորման առաջին փուլը:

Էլգայի ածխահանքը խոշորագույններից մեկն է աշխարհում, դրա պաշարները, ըստ գնահատականների, հասնում են 2,2 միլիարդ տոննայի:

Ալբերտ Ավդոլյանն ու նրա գործընկեր Սերգեյ Ադոնևը Յակուտիայում արդյունաբերական կլաստեր ստեղծելու մասշտաբային ծրագիր ունեն, որը պետք է ներառի Յակուտսկի վառելիքաէներգետիկ ընկերությունը, Օգոջինյան ածխային նախագիծը և Հեռավոր Արևելքի Վերա նավահանգիստը:

Ալբերտ Ավդոլյանը 800 միլիոն դոլար ունեցվածքով Ռուսաստանի 200 ամենահարուստ գործարարների ցանկում զբաղեցնում է 113-րդ հորիզոնականը: