«Կընդունեմ Ձեզ իմ քաղաքում, որի մուտքին կտեսնեք Արցախի ծածանվող դրոշը». Բուրգ լե Վալանսի քաղաքապետի ուղերձը

Ֆրանսիայի Բուրգ լե Վալանսի քաղաքապետ, Ֆրանսիա-Արցախ բարեկամության շրջանակի փոխնախագահ Մարլեն Մուրիեն շնորհավորական ուղերձ է հղել Արցախի Հանրապետության նորընտիր նախագահ Արայիկ Հարությունյանին:

Ուղերձում ասված է.

«Արցախի Հանրապետության հարգարժան պարո՛ն Նախագահ

Տեղեկացա աննախադեպ արդյունքներով Ձեր՝ Արցախի Հանրապետության Նախագահ ընտրվելու լուրի մասին և ուզում էի անհապաղ շնորհավորել Ձեզ՝ չնայած համաշխարհային համաճարակով պայմանավորված այս դժվար ժամանակներին և իմ քաղաքում դրա ունեցած հետևանքներին:

Արցախի Հանրապետությունն առանձնանում է ժողովրդավարության տեսանկյունից և մնում օրինակ իր հարևանների համար:

Օգտվելով այս առիթից` ցանկանում եմ վերահաստատել իմ նվիրվածությունն ու լիարժեք աջակցությունը թե՛ Շուշի քաղաքին, որի հետ մենք 2014 թվականին ստորագրել ենք Բարեկամության հռչակագիր, թե՛ Արցախին, որի արժանիքների մասին ես չեմ դադարում խոսել և պաշտպանել խաղաղության իր արժեքները:

Այդ իսկ պատճառով է, որ երկար տարիներ ի վեր ներգրավվել եմ միջազգային կառույցների կողմից Ձեր երիտասարդ հանրապետության ճանաչման գործում:

Հուսով եմ, որ մի օր կկարողանամ ընդունել Ձեզ իմ քաղաքում՝ Բուրգ-լե-Վալանսում, որի մուտքին կտեսնեք Արցախի ծածանվող դրոշը:

Գիտակցում եմ Ձեր գործի ծավալի բնույթը, սակայն իմացեք, որ կարող եք ապավինել իմ լիակատար աջակցությանը:

Անկեղծորեն հուսալով, որ Ձեր հանրապետությունը այն աստիճան չի տուժում կորոնավիրուսային պանդեմիայից, ինչպես մենք, և որ դրանից զերծ կմնա, խնդրում եմ, ընդունեք, պարո՛ն Նախագահ, հարգանքներիս խորին հավաստիացումը»: