BlackBerry-ն կդադարեցնի իր գոյությունը

TCL Communications ընկերությունը հայտարարել է BlackBerry ապրանքանիշը փակելու մասին։ Շարքի սմարթֆոնների վաճառքը կդադարեցվի աշնանը, Twitter-ում հայտնում է BlackBerry Mobil-ը, տեղեկացնում է Lenta-ն։

Հայտարարության մեջ ասվում է, որ այս տարի BlackBerry բջջային ապրանքանիշը կդադարեցնի իր գոյությունը։ TCL Communications ընկերությունը, որը իրավունքներ ունի սարքերի շարքի հանդեպ, 2020թ․ օգոստոսի 31-ից հետո կդադարեցնի սմարթֆոնների վաճառքը։

Ապրանքանիշի ամփոփման համաձայն, BlackBerry-ի երկրպագուները գնահատել են KEY նորացված շարքը, որի շրջանակներում թողարկվել է մի քանի սմարթֆոն։ Ընկերությունը շնորհակալություն է հայտնել օգտատերերին եւ ապրանքանիշի գործընկերներին՝ նկատելով, որ լուսավոր ապագայի հույս ունի ինչպես TCL Communication-ի, այնպես էլ BlackBerry Limited-ի համար։

2016թ․ դեկտեմբերից BlackBerry-ն պատկանում էր TCL Communications ընկերությանը, որը սարքերի թողարկման եւ վաճառքի իրավունք ուներ։ Ավելի վաղ BlackBerry-ն հրաժարվել էր սմարթֆոնների արտադրությունից՝ կենտրոնանալով ծրագրային ապահովման վրա։

BlackBerry հեռախոսների եւ սմարթֆոնների առանձնահատկություններից են բիզնես-դիրքորոշումը, անձնական տվյալների պաշտպանությունը եւ ֆիզիկական QWERTY-ստեղնաշարը։ BlackBerry ապրանքանիշի առաջին սարքը թողարկվել է 1997թ․՝ Research In Motion ընկերության կողմից։