Նովակ Ջոկովիչը հաղթանակից հետո արտասվել է` հիշելով Քոբի Բրայանթին (տեսանյութ, լուսանկարներ)

Թենիսիստ Նովակ Ջոկովիչն Ավստրալիայի բաց առաջնության քառորդ եզրափակիչում 3 սեթում Միլոշ Ռաոնիչին հաղթելուց հետո հարգանքի տուրք է մատուցել ուղղաթիռի կործանման հետևանքով մահացած բասկետբոլիստ Քոբի Բրայանթին: Այս մասին տեղեկացնում է dailymail.com-ը:

Գործող չեմպիոնը հուզվել է ընկերոջ մասին խոսելիս:

«Այս լուրը մեզ իրոք հանկարծակիի բերեց: Նա բոլոր ժամանակների մեծագույն աթլետներից մեկն էր, նա ոգեշնչել է ինձ և շատ այլ մարդկանց ամբողջ աշխարհում: Ես երջանկություն եմ ունեցել անձամբ շփվել նրա հետ վերջին 10 տարվա ընթացքում: Երբ ինձ խորհուրդ ու աջակցություն էր պետք, նա իմ կողքին էր: Նա իմ մարզիչն էր, իմ ընկերն էր, սիրտդ կոտրվում է, երբ տեսնում ես, թե ինչ է եղել նրա և նրա դստեր հետ»,-ասել է Ջոկովիչը:

Խաղի ընթացքում գործող չեմպիոնի մոտ միակ դժվարությունն առաջացել է միայն երրորդ սեթում, երբ նա խնդիրներ է ունեցել կոնտակտային լինզաների հետ: Ջոկովիչն ընդմիջում է վերցրել երրորդ սեթում, և չնայած նրան, որ ընկճված տեսք է ունեցել և մարզիչների օգնությունն է փնտրել, կարողացել է խաղն ավարտել երրորդ սեթի թայ-բրեյքում:

Հիշեցնենք, որ հունվարի 27-ին Կալիֆոռնիայում ուղղաթիռի կործանման հետևանքով 9 զոհերի թվում է եղել նաև բասկետբոլիստ Քոբի Բրայանթը և նրա 13-ամյա դուստրը` Ջիաննա Մարիա-Օնորեն: Ողբերգության հնարավոր պատճառներից է վատ տեսանելիությունը, քանի որ այդ օրը Կալիֆոռնիայում մառախուղ է եղել:

Ուղղաթիռն օդ է բարձրացել Կալիֆոռնիայի Օրինջ շրջանից և ուղևորվել դեպի Թաուզանդ Օքս քաղաք: Ռադարի տվյալների համաձայն` ուղղաթիռը 15 րոպեի ընթացքում Գլենդեյլ քաղաքի վրա 10 պտույտ է կատարել, որից հետո ընկել է Լոս Անջելեսից 30 կիլոմետր հեռավորության վրա գտնվող Կալաբասաս սարի լանջին:

Բրայանթն ամբողջ կարիերայի ընթացքում հանդես է եկել «Լոս Անջելես Լեյքերս» ակումբում, որի կազմում Ազգային բասկետբոլային ասոցիացիայի հինգ չեմպիոնական տիտղոսի է արժանացել:

Բասկետբոլիստը մարզական կարիերան ավարտել է 2016 թվականին, որից հետո մանկական պատմվածքների ժողովածու և մի քանի գիրք է հեղինակել, որում պատմել է կարիերայի դժվարությունների մասին: