Apple-ը 5G ցանցի աջակցությամբ iPhone կներկայացնի

Apple-ն իր սարքավորումների արտադրողներին խնդրել է 5G ցանցի աջակցությամբ iPhone ստեղծել, գրում է «Վեդոմոստի»-ն՝ հղում անելով Nikkei Asian Review-ին:

Պարբերականի զրուցակցի խոսքով՝ 2020-ին ներկայացվելիք 3 մոդելները հագեցած կլինեն առաջադեմ պրոցեսորով եւ էկրանով:

Ընկերությունը մտադիր է 80 մլն սարքավորում առաքել: Մեկ այլ աղբյուրի խոսքով՝ ընկերությունը «վաճառքների ագրեսիվ նպատակ է դրել իր առջեւ»:

Nikkei Asian Review-ն գրում է, որ Apple-ն այդպիսով հույս ունի Huawei-ին հեռացնել սմարթֆոնների արտադրողների երկրորդ հորիզոնականից: Ե՛վ Huawei-ն, ե՛վ սմարթֆոնների խոշոր արտադրող Samsung-ն արդեն 5G ցանցի աջակցությամբ սմարթֆոններ են թողարկել: Եթե Apple-ը նման սմարթֆոն ներկայացնի, ապա հավանականությունը մեծ է, որ կարագացնի աշխարհում համապատասխան ենթակառուցվածքի զարգացումը, հատկապես՝ Չինաստանի սահմաններից դուրս, որն արդեն խոշոր ներդրումներ է արել տեխնոլոգիաների զարգացման գործում, գրում է պարբերականը:

Այն, որ Apple-ը 2020-ին 5G ցանցի աջակցությամբ iPhone կներկայացնի, կանխատեսել է նաեւ TF International Securities-ի վերլուծաբան Մինգ-Չի Կուոն: Նա հայտնի է Apple-ի ծրագրերի վերաբերյալ իր ճշգրիտ կանխատեսումներով:

Այս տարի Apple-ը շնորհանդեսի ժամանակ ներկայացրել է բյուջետային iPhone 11 մոդելը, ինչպես նաեւ iPhone 11 Pro-ն եւ iPhone 11 Pro Max-ը՝ 4G ցանցի աջակցությամբ: