Ամուլսարը եւ նախագահ Արմեն Սարգսյանը

2010-2011 թվականներից նախագահ Արմեն Սարգսյանը սկսում է իր գործողություններն Ամուլսարի հանքի շահագործման ուղղությամբ, «Հայելու առաջ» հաղորդման ժամանակ հայտարարել է ՀՀ նախկին վարչապետ Հրանտ Բագրատյանը:

«Արմեն Սարգսյանը շատ խորամանկ մարդ է»,- պնդել է բագրատյանը, հիշեցնելով, որ այդպես էլ որեւէ մեկը չի տեսել, որ նա ՀՀ քաղաքացի է: Բագրատյանն առաջարկում է այդ փաստաթուղթը հրապարակել նախագահի կայքում: Նա նաեւ շեշտեց, թե Նիկոլ Փաշինյանի խղճի վրա է մնալու այդ փաստաթղթի հարցը, որն իբր նա տեսավ, բայց այդպես էլ որեւէ մեկին ցույց չտվեցին:

Հրանտ Բագրատյանը հիշեցրել է տարիներ առաջ Արմեն սարգսյանի կողմից հիմնադրված «Երեւան իմ սեր» հիմնադրամի մասին, որն ամբողջ գումարը տեղափոխեց Մեծ Բրիտանիա: Ըստ Հրանտ Բագրատյանի, հիմնադրամը ստեղծվել էր փողերի լվացման համար:

Ավելին, Հրանտ Բագրատյանը պնդում է, որ այստեղ խառն է նաեւ բրիտանական արքայազն Չառլզի մատը, որն ունի այդպիսի տասնյակ հիմնադրամներ, որով գումարներ է լվանում: «Եթե նա նորմալ մարդ լիներ, թագը վաղուց իրեն կտային»,- ընդգծել է Բագրատյանը:

ՀՀ նախկին վարչապետը նշեց, որ Ամուլսարի տեղը իմացել են եւ իրենք եւ մյուս բոլոր իշխանությունները, բայց նպատակահարմար չեն գտել դրա շահագործումը: Նա ընդգծեց, որ այնտեղ նաեւ ուրանի պաշարներ կան՝ դրանից բխող բոլոր հետեւանքներով:

Հրանտ Բագրատյանը կոչ է անում հրապարակել այնփաստաթուղթը, որը մեզ ցույց կտա, թե երբ է պայմանագիր կնքվել «Լիդիանի» հետ:

Հանքի շահագործման համար երկիրը, այդ թվում Հայաստանը պետք է ունենա իր ստանդարտները: Նախկին վարչապետը համոզված է, որ դրանք պետք է լինեն այնպիսին, ինչպիսիք գործում են Ալյասկայում եւ Կանադայում:

«Եթե մենք չունենք շրջակա միջավայրի պահպանությանը վերաբերող մեր ստանդարտները, ապա ինչու համար են անցկացվում փորձաքննություն եւ ինչի հետ մենք այն պետք է համեմատենք»,- ընդգծում է Բագրատյանը, որը համոզված է, որ 400 հազար դոլարը պարզապես կառավարությունը ջուրն է գցել:

ՀՀ նախկին վարչապետը հիշեցրել է նաեւ Թեղուտի խայտառակ եւ սարսափելի վիճակը, խոսելով առկա պարտքերի եւ պետության վրա մնացած բեռի մասին:

Ամուլսարի հանքի շահագործում, ըստ Բագրատյանի, Փաշինյանի կառավարությունը կարող էր կանգնեցնել, բայց դա չարվեց:

Հրանտ Բագրատյանը տարօրինակ է համարում, որ Փաշինյանն Ամուլսարի հարցում չի դիմում Արմեն Սարգսյանի օգնությանը: Բացի այդ, Հրանտ Բագրատյանը երկու հարց ուղղեց նախագահ Արմեն Սարգսյանին.

1. Ամուլսարի հանքի բաժնեմասեր ունեցե՞լ եք

2. Եթե ունեցել եք, ապա երբ եք այն վաճառել:

Հրանտ Բագրատյանը շեշտեց, որ Էլարդի իրականացրած փորձաքննությունում ոչինչ չի ասվում ուրանի մասին եւ ավելացրեց, որ հանքի շահագործման որեւէ հիմք չի տեսնում:

Top-News.am