Առայժմ գործնականում ամեն ինչ հակառակ տեսքն ունի. սահմանվում են նոր պատժամիջոցներ, բաց ծովում «պատերազմ» է կազմակերպվում լցանավերի դեմ. Լավրով

ՌԴ արտաքին գործերի նախարար Սերգեյ Լավրովը հայտարարել է, որ գործնական քայլերը դեռևս չեն համապատասխանում ԱՄՆ նախագահ Դոնալդ Թրամփի վարչակազմի այն հայտարարություններին, թե իրենք մերժում են Ռուսաստանի նկատմամբ Սպիտակ տան նախկին ղեկավար Ջոզեֆ Բայդենի քաղաքականությունը և դիտարկում են փոխշահավետ համագործակցության հնարավորությունը։ «Մեզ ասում են, որ պետք է լուծել ուկրաինական խնդիրը։ Անքորիջում մենք ընդունեցինք Միացյալ Նահանգների առաջարկը։ Եթե մոտենանք «տղամարդավարի», ապա նրանք առաջարկեցին՝ մենք համաձայնեցինք, նշանակում է՝ խնդիրը պետք է լուծվի։ (...) Մեզ համար կարևոր էր ԱՄՆ-ի դիրքորոշումը։ Ընդունելով նրանց առաջարկը՝ մենք կարծես թե կատարեցինք ուկրաինական հարցը լուծելու և լիամասշտաբ, լայն ու փոխշահավետ համագործակցության անցնելու խնդիրը», - ասել է Լավրովը TV BRICS միջազգային ցանցին տված հարցազրույցում։

«Այսինքն՝ տնտեսական ասպարեզում ամերիկացիները հայտարարել են տնտեսական գերիշխանության հասնելու խնդրի մասին»,- փաստել է ՌԴ ԱԳ նախարարը։ «Նշեմ նաև, որ չնայած ԱՄՆ նախագահ Թրամփի վարչակազմի բոլոր այն հայտարարություններին, թե անհրաժեշտ է վերջ դնել Բայդենի սանձազերծած պատերազմին Ուկրաինայում, պայմանավորվել ու այն հանել օրակարգից և որ այդ դեպքում, իբր, կբացվեն ռուս-ամերիկյան փոխշահավետ ներդրումային ու այլ համագործակցության հստակ և լուսավոր հեռանկարներ, այդ վարչակազմը չի վիճարկում ոչ մի օրենք, որոնք Բայդենն ընդունել է Ռուսաստանին «պատժելու» համար՝ հատուկ ռազմական գործողության մեկնարկից հետո», նշել է Լավրովը։

ՌԴ ԱԳ նախարարն ուշադրություն է հրավիրել այն փաստի վրա, որ 2025 թվականի ապրիլին երկարաձգվել է նախագահ Բայդենի կողմից դեռևս 2021 թվականին ստորագրված թիվ 14024 գործադիր հրամանը, «որի կորիզը Ռուսաստանին «պատժելն» է, մեր երկրի դեմ պատժամիջոցների սահմանումը՝ ներառյալ ռուսական ոսկեարժութային պահուստների սառեցումը»։ Լավրովի խոսքով՝ «այս ամենը զտարյուն «բայդենականություն» է, որն ԱՄՆ նախագահ Թրամփն ու իր թիմը մերժում են»։

«Այնուամենայնիվ, նրանք հանգիստ «անցկացրեցին» դա և Ռուսաստանի դեմ օրենքն ու պատժամիջոցները շարունակում են գործել։ Նրանք պատժամիջոցներ սահմանեցին «Լուկօյլի» և «Ռոսնեֆտի» նկատմամբ։ Ընդ որում, նրանք դա արեցին աշնանը՝ Ռուսաստանի նախագահ Վլադիմիր Պուտինի և ԱՄՆ նախագահ Թրամփի՝ Անքորիջում ունեցած լավ հանդիպումից ընդամենը մի քանի շաբաթ անց»,- ասել է Լավրովը։

«Բացի այն, որ նրանք կարծես թե առաջարկ արեցին Ուկրաինայի վերաբերյալ, և մենք պատրաստ էինք (իսկ հիմա նրանք պատրաստ չեն), մենք տնտեսության ոլորտում ևս որևէ «վարդագույն» ապագա չենք տեսնում։ Ամերիկացիները ցանկանում են իրենց վերահսկողության տակ առնել բոլոր առաջատար երկրների ու մայրցամաքների էներգակիրների մատակարարման բոլոր երթուղիները։ Եվրոպական մայրցամաքում նրանք «աչք ունեն» երեք տարի առաջ պայթեցված «Հյուսիսային հոսքերի», ուկրաինական գազատրանսպորտային համակարգի և «Թուրքական հոսքի» վրա»,- նշել է ՌԴ ԱԳ նախարարը։

Ինչպես պարզաբանել է Լավրովը. «Համագործակցության առումով բաց մնալով բոլոր երկրների, այդ թվում՝ այնպիսի խոշոր տերության հետ, ինչպիսին Միացյալ Նահանգներն են՝ ճիշտ այնպես, ինչպես Հնդկաստանը, Չինաստանը, Ինդոնեզիան, Բրազիլիան, մենք գտնվում ենք մի իրավիճակում, երբ հենց ամերիկացիներն են այդ ճանապարհին արհեստական խոչընդոտներ ստեղծում»։ «Մենք ստիպված ենք ԲՐԻԿՍ-ի երկրների հետ փնտրել մեր ֆինանսական, տնտեսական, ինտեգրացիոն, լոգիստիկ և այլ նախագծերի զարգացման լրացուցիչ պաշտպանված ուղիները»,- եզրափակել է Լավրովը։