Թրամփը Զելենսկուն մեկ շաբաթ է տվել ՌԴ պահանջներով խաղաղության համաձայնագիրը ստորագրելու համար. FT

ԱՄՆ վարչակազմում սպասում են, որ Ուկրաինայի նախագահ Վլադիմիր Զելենսկին կընդունի Վաշինգտոնի մշակած խաղաղության պլանը մինչեւ Երախտագիտության օրը, որն այս տարի նշվելու է նոյեմբերի 27-ին, Financial Times-ին (FT) տեղեկացրել են բանակցություններին ծանոթ ուկրաինացի պաշտոնյաները։ Նրանց խոսքով՝ դրանից հետո ամերիկացի պաշտոնատար անձինք պատրաստվում են խաղաղության համաձայնագիրը ներկայացնել Մոսկվայում, որպեսզի ավարտվի հակամարտության կարգավորման գործընթացը մինչեւ դեկտեմբերի սկիզբ։ Սակայն Ուկրաինայի նախագահի գրասենյակում կարծում են, որ դա այդ ժամկետում կատարել չի հաջողվի, քանի որ ԱՄն պլանում կան մի քանի կետեր, որոնք Կիեւի համար «կարմիր գծեր» են համարվում։ FT-ի զրուցակիցներն ավելացրել են, որ աշխատում են հանդիպակաց առաջարկների վրա, որոնք շուտով կներկայացվեն ամերիկյան կողմին։

Բացի այդ, ԱՄՆ-ը եւ Եվրոպան կաշխատեն Ուկրաինայի վերականգնման ուղղությամբ՝ օգտագործելով ռուսական սառեցված 100 միլիարդ դոլարի ակտիվներ եւ սեփական ներդրումներ: Կիեւը կստանա անվտանգության երաշխիքներ ԱՄՆ-ից, իսկ Մոսկվան օրենքով կամրագրի Եվրոպայի եւ Ուկրաինայի դեմ չհարձակման քաղաքականությունը: Համաձայնագրի ստորագրումից 100 օր անց Ուկրաինայում կանցկացվեն նաեւ նախագահական ընտրություններ։

Axios-ի տվյալներով՝ Թրամփի հատուկ բանագնաց Սթիվ Ուիթքոֆը աշխատել է առաջարկվող խաղաղության ծրագրի վրա: Նա նաեւ խորհրդակցել է Ռուսաստանի նախագահի արտասահմանյան երկրների հետ ներդրումների եւ տնտեսական համագործակցության հարցերով հատուկ ներկայացուցիչ Կիրիլ Դմիտրիեւի հետ: Դմիտրիեւը հաստատել է իր մասնակցությունը խաղաղության ծրագրին՝ բարձր գնահատելով դրա հաջողության հնարավորությունները: «Մենք զգում ենք, որ Ռուսաստանի դիրքորոշումն իսկապես լսվում է»,  ասել է Դմիտրիեւը։