Մարտի 1-ի գործի քննության արդյունավետության հարցը եղել և շարունակում է մնալ մեր ուշադրության կենտրոնում

2008 թվականի Մարտի 1-ի իրադարձությունները պետք է գնահատել ոչ միայն կյանքի իրավունքի տեսանկյունից, որը եղել է և շարունակում է մնալ քննարկումների կենտրոնում, այլև մի շարք այլ հիմնարար ազատությունների խախտումների համատեքստում։ Այս մասին նոյեմբերի 18-ին Ազգային ժողովում՝ «Մարտի 1»-ի գործի քննությունը նախորդող ժամանակահատվածում։ «Մարտի 1»-ի գործի վերաիմաստավորումը» թեմայով հանրային քննարկման ժամանակ, հայտարարել է Հայաստանի Մարդու իրավունքների պաշտպան Անահիտ Մանասյանը։ Այս մասին հաղորդում է News.am լրատվականը:

Նա նաև ուշադրություն է հրավիրել ուժի կիրառման հարցում համաչափության բացակայության վրա՝ նշելով, որ Մարդու իրավունքների եվրոպական դատարանը ևս արձանագրել է այս խնդիրը, մասնավորապես ընդգծելով, որ ձեռնարկված գործողությունները կազմակերպված չեն եղել այնպես, որ նվազագույնի հասցվի հնարավոր վնասը և բացասական հետևանքները։

Մանասյանի խոսքով՝ քննության արդյունավետության հարցը եղել և շարունակում է մնալ Մարդու իրավունքների պաշտպանի գրասենյակի ուշադրության կենտրոնում։

Նա նշել է, որ ՄԻԵԴ-ն արդեն իսկ հստակեցրել է այս հարցի վերաբերյալ իր դիրքորոշումը՝ նշելով քննության անբավարարությունը և պետության կողմից ստանձնած պարտավորությունների չկատարումը։

Հիշեցնենք, որ 2008 թվականի մարտի 1-ին, Երևանի կենտրոնում իշխանության և ընդդիմության միջև տեղի ունեցած բախման հետևանքով զոհվել է 8 ցուցարար և Ներքին զորքերի 2 զինծառայող։