Սպիտակ տունը 7 ճեպազրույց է անցկացրել օրենսդիրների համար՝ թմրանյութ վաճառողներին հարվածներ հասցնելու վերաբերյալ

Սպիտակ տունը փակ դռների հետևում յոթ ճեպազրույց է անցկացրել ԱՄՆ Կոնգրեսի համար՝ թմրանյութերի ապօրինի շրջանառության մեջ կասկածվող նավերի դեմ ուղղված ռազմական հարվածների վերաբերյալ, հաղորդում է CNN-ը։

«Սեպտեմբերի սկզբից ի վեր վարչակազմը յոթ առանձին փակ դռնով ճեպազրույց է անցկացրել Կոնգրեսի հետ, ներառյալ Ներկայացուցիչների պալատի ղեկավարության անդամների կամ աշխատակիցների, Սենատի ղեկավարության, Ներկայացուցիչների պալատի և Սենատի զինված ուժերի կոմիտեների, Ներկայացուցիչների պալատի հետախուզության կոմիտեի, ինչպես նաև Ներկայացուցիչների պալատի արտաքին գործերի և Սենատի արտաքին հարաբերությունների կոմիտեների անդամների կամ աշխատակիցների հետ», - հայտարարության մեջ ասել է Թրամփի վարչակազմի բարձրաստիճան պաշտոնյան։

Պաշտոնյան պարզաբանել է, որ ճեպազրույցները կենտրոնացած էին հատկապես թմրանյութեր տեղափոխելու մեջ կասկածվող նավերի դեմ ուղղված հարվածների վրա։

Այսպիսով, դեմոկրատ սենատոր Մարկ Քելլին, ABC News-ին տված հարցազրույցում նշել է, որ Սպիտակ տան և Պենտագոնի պաշտոնյաները, որոնք ճեպազրույց են անցկացրել Սենատի հետախուզության կոմիտեի հետ, չեն կարողացել «տրամաբանական բացատրություն» տալ հարվածների օրինականության համար։

Ավելի վաղ ամերիկյան լրատվամիջոցները հայտնել էին, որ Թրամփը, առանց հրապարակավ հայտարարելու, հրամայել է օգտագործել բանակը՝ ամերիկյան տարածքից դուրս լատինաամերիկյան թմրակարտելների դեմ պայքարելու համար։ ԱՄՆ հրամանատարությունը Լատինական Ամերիկայի ափեր է ուղարկել ութ նավ և մեկ սուզանավ։