Ռուսաստանցի թենիսիստներ Կարեն Խաչանովն ու Անդրեյ Ռուբլյովը բարեգործական հանդիպում են անցկացրել Լոս Անջելեսում Արցախից բռնի տեղահանված ընտանիքների համար

Ռուսաստանցի թենիսիստներ Կարեն Խաչանովն ու Անդրեյ Ռուբլյովը բարեգործական հանդիպում են անցկացրել Լոս Անջելեսում Արցախից բռնի տեղահանված ընտանիքների համար:
Ինչպես տեղեկացնում է թե Armenian Report ամերիկյան-հայկական պարբերականը, հանդիպումը տեղի է ունեցել UCLA թենիսի համալիրում (Լոս Անջելեսի Կալիֆոռնիայի համալսարան), իսկ կազմակերպիչն է եղել Գլենդելի սիրողական մարզական ակումբը՝ Homenetmen Glendale Ararat-ը:
Խաղից առաջ Խաչանովն ու Ռուբլյովը միացել են սկաուտներին, որոնք ԱՄՆ-ի և Կալիֆոռնիա նահանգի դրոշների հետ միասին խաղադաշտով տարել են Հայաստանի և Արցախի դրոշները:
Հավելենք, որ ռուս առաջատար թենիսիստներին, իրենց իսկ խոսքով, միավորում է երկարամյա բարեկամությունը: Դա երևում էր նաև նրանից, թե ինչպես էին թենիսիստները կատակում խաղի ժամանակ։
-Դուք մականուն ունեք,- բարեգործական խաղի հաղորդավարուհին հարցրել է Խաչանովին։
-Ջան... Կարեն ջան,- պատասխանել է նա:
-Դուք նրան այդպե՞ս եք անվանում,- այս անգամ արդեն Ռուբլյովին հարցրել է հաղորդավարուհին։
-Նա ուզում է, որ իրեն այդպես կոչեն... բայց ես նրան ուղտ եմ անվանում, - պատասխանել է Ռուբլյովը։ Կատակը ծիծաղեցրել է ներկաներին, այդ թվում՝ Խաչանովին։
Նշենք, որ բարձրահասակ Կարենն աչքի է ընկնում ուժեղ փոխանցումներով։
Ո՞րն է հայկական սիրելի ուտեստը․ Խաչանովը նշել է տոլման, իսկ Ռուբլյովը՝ քաբաբը:
Դժվարին պայքարում Կարենը հաղթել է 6:3, 4:6, 10:8, սակայն իսկական հաղթանակ է դարձել ավելի քան 100 հազար դոլարը, որը հավաքվել է՝ ի աջակցություն արցախցի փախստականների ընտանիքների։