Հետազոտողները վերականգնել են 17-րդ դարի ֆլամանդացի վարպետ Կորնելիս դե Վոսի ընտանեկան դիմանկարը

Դանիայից հետազոտողները հավաքել են 1626 թվականին ֆլամանդացի վարպետ Կորնելիս դե Վոսի կողմից նկարված ընտանեկան դիմանկարի երկու մասերը, որոնք ենթադրվում է, որ արհեստականորեն բաժանվել են 1830-ից 1859 թվականներին վնասվելուց հետո, ասվում է Nivaagaards Malerisamling թանգարանի հայտարարության մեջ:

Զարմանալի գտածոն առաջին անգամ հայտնաբերվել է, երբ «Հոր եւ որդու կրկնակի դիմանկարը» կտավի ներքեւի աջ անկյունում նկատել են զգեստի մի կտոր, որը, ըստ հետազոտողների, ցույց է տալիս, որ «մայրը առանձնացված է եղել»:

Հետազոտողները սկսել են անհետացած մոր որոնումները անցյալ տարի եւ հայտնաբերել 1966 թվականին Կոպենհագենում գտնվող Ազգային արվեստի թանգարանի զեկույցը, որում ներառված է նկարի լուսանկարը, որն արվել է այն մաքրելուց եւ վերականգնվելուց հետո:

Այս լուսանկարը ցույց է տալիս անհետացած կնոջ ձեռքի «խնամքով մշակված» մանրամասները, որոնք առաջին հայացքից չեն երեւում դիմանկարի ներկայիս վիճակում, ինչը, ըստ հետազոտողների, «նոր լույս է սփռում այն ​​բանի վրա, թե որքան վեհ եւ էլեգանտ» պետք է լիներ բնօրինակ դիմանկարը:

Թանգարանի հատուկ խորհրդատու Յորգեն Վադումը, ասել է, որ փորձագետների թիմը սկսել է իր աշխատանքը՝ դե Վոսի նկարներում պատկերված այլ կանանց միջեւ զուգադիպություններ փնտրելով։

Վադումը նշել է, որ բախտն իրեն ժպտացել է, երբ որոշել է Google-ում պարզ որոնել «տիկնոջ դիմանկարը»:

Արդյունքում պարզվել է, որ 2014 թվականին Լոնդոնի Christie's աճուրդում «Կնոջ դիմանկարը» անսպասելի վերնագրով աշխատանք է ցուցադրվել, որը պատկերել է լայն օձիքով զգեստով մի կին:

«Նկարի նոր սեփականատերը՝ Սալոմոն Լիլիանը՝ Ամստերդամում եւ Ժնեւում գործող արվեստի առաջատար դիլերը, մաքրել եւ վերականգնել է դիմանկարը այն գնելուց անմիջապես հետո», - ասվում է Nivaagaard Collection-ի հաղորդագրության մեջ։

«Տիկնոջ դիմանկարի» վերականգնումը ներառում էր նկարի ֆոնի հեռացման գործընթացը, որից պարզ է դարձել, որ ներկի շերտ է ավելացվել՝ սկզբնական ֆոնը թաքցնելու համար։

«Դիմանկարի ձախ կողմում գտնվող նրբագեղ տիկնոջ հետեւում սկսեց առաջանալ հեռավոր լանդշաֆտ, ինչպես նաեւ կապույտ երկինք՝ սպիտակ հորիզոնական ամպերով», - նշել են թանգարանում:

Պարզվել է, որ այս բնապատկերը համընկնում է «Կրկնակի դիմանկարի» ֆոնի հետ։