Մենք քայլ ենք արել առաջ, բայց դրան հաջորդելու են ամենադժվար քայլերը
Ազգերի լիգայի խաղարկության C2 խմբի երկրորդ տուրում Չեռնոգորիայի ազգային հավաքականը Երևանի Վազգեն Սարգսյանի անվան «Հանրապետական» մարզադաշտում դրամատիկ պայքարում 3-2 հաշվով հաղթանակ կորզեց Հայաստանի ընտրանուց:
Խաղից հետո հյուրերի գլխավոր մարզիչ Միրկո Վուչինիչը հետխաղային մամուլի ասուլիսի ժամանակ ամփոփել է հանդիպումն ու պատասխանել լրագրողների հարցերին։
Հաղթանակի, կենտրոնացման կորստի և թիմային ոգու մասին
«Երբ հաղթում ենք, բոլորս երջանիկ ենք ու գոհ, դեմքերին ժպիտ կա։ Այժմ բոլորս տոնում ենք, իսկ վաղվանից արդեն կենտրոնանալու ենք Լատվիայի վրա, որտեղ մեզ նոր կարևոր հանդիպում է սպասվում։ Ինչ վերաբերում է հայերի գոլից հետո խաղային խառնաշփոթին, ապա անկումներ լինում են։ Թիմը պետք է աճի, մենք աշխատում ենք դրա վրա, բայց դժվար է պահպանել կենտրոնացումը։ Այնուամենայնիվ, դրանից հետո մենք լավ ֆուտբոլ ցուցադրեցինք։ Երևում էր ցանկությունը, քաղցն ու կամքը՝ հաղթելու այս խաղում։ Երևում էր թիմի միասնականությունը»։
Բաց թողած գոլերի և հանդիպման լարված ավարտի մասին
«Մենք ոչ մեկին ոչինչ չենք նվիրում, բայց ցավալի է, թե ինչպես ենք գոլեր բաց թողնում։ Առաջին գոլի դրվագում հաղորդակցությունը վատն էր, կանգ առանք, որովհետև նրանցից երկուսը խաղից դուրս վիճակում էին, ինչը շփոթեցրեց կենտրոնական պաշտպաններին։ Երկրորդ գոլի ժամանակ սխալվեցինք կիսապաշտպանության դասավորվածության հարցում։ Չեմ կարող ասել, որ բարկացած եմ, բայց 2-1 հաշվի ժամանակ կարող էինք ավելի շատ վերահսկել գնդակն ու չնետվել առաջ։ Կցանկանայի, որ հանդիպումներն ավելի հանգիստ ավարտեինք։ Ես կորցնում եմ ձայնս, և կարծում եմ՝ գլուխս կպայթի այսպիսի խաղերից»։
Հայաստանի հավաքականի նկատմամբ հարգանքի և բեկումնային փոփոխությունների մասին
«Մենք Հայաստանի նկատմամբ մեծ հարգանքով էինք եկել, բայց առանց վախի։ Ցանկանում էինք թելադրել մեր ոճը, ինչը տղաները լավ էին անում։ Եղան նաև կենտրոնացման կորստի պահեր, բայց նման բան պատահում է։ Երբ հաշիվը դարձավ 2-2, ես երկու հարձակվող մտցրեցի դաշտ: Տեսա, թե ինչպես է Յովետիչը վազում օգնելու պաշտպանությանը, և նա ցույց տվեց, թե ինչպես է հարձակվողը դառնում կիսապաշտպան։ Երբ մենք ավելի մոտ ենք դարպասին, շատ ավելի վտանգավոր ենք: Տեսա, որ տղաները ցանկանում են հաղթել, և նրանց այդ ցանկությունն ինձ դրդեց խաղադաշտ դուրս բերել հարձակվողներին»։
Առաջիկա ծանր հանդիպման և էյֆորիայի բացակայության մասին
«Այո, մենք ճիշտ ուղու վրա ենք, բայց դեռ ունենք մի քանի վտանգավոր շրջադարձեր և պետք է զգույշ լինենք։ Բոլորը կարծում են, որ Լատվիայի դեմ հեշտ է լինելու, բայց ես մարզչական շտաբին ասել եմ, որ այդ խաղը լինելու է ամենաբարդը։ Էյֆորիա կա, բոլորը մեզ տեսնում են որպես խմբի հաղթողներ, բայց դրանք պարզապես բառեր են, որոնք քամին տանում է։ Պարզապես չպետք է էյֆորիա լինի. մենք քայլ ենք արել առաջ, բայց դրան հաջորդելու են ամենադժվար քայլերը»։
Ազգերի լիգայի խաղարկության հաջորդ տուրում՝ հոկտեմբերի 2-ին, Չեռնոգորիայի հավաքականը հյուրընկալվելու է Լատվիային, որին մեր ընտրանին առաջին տուրում հաղթել էր 2-0 հաշվով։
armsport.am
Լույսն ամենաթանկ նվերն է, որ կարող ես տալ մարդուն
Ով կներկայացնի Հայաստանն այս տարի «Մանկական Եվրատեսիլ» մրցույթում
Արգենտինան ներկայացնող Արսեն Ջուլֆալակյանը ոսկե մեդալ նվաճեց
Ջերմ ողջույններ Սյունիքի դարպասներից․ Կլաուդիա Բուշը ԵՄ դեսպանների հետ ուղևորվել է Հայաստանի ամենահա...
Շարունակում ենք ստուգայցերը ՊՆ զորամասեր (տեսանյութ)
Դեպի Երևան․ ինչպե՞ս (տեսանյութ)
Երթևեկության կազմակերպման փոփոխություն՝ Վարդանանց փողոցում
Տուրիստ չեմ` ավտոբուս չկա
Առաջին նոր երգ` հարսանիքից հետո
Էլեկտրաէներգիայի ընդհատումներ կլինեն Երևանում և մարզերում