«Վրացական երազանք» կուսակցություն. Վրաստանի կողմից ՌԴ-ի դեմ կիրառվող պատժամիջոցները որեւէ դեր չեն ունենա

Իշխող «Վրացական երազանք» կուսակցության նախագահ Իրակլի Կոբախիձեն հայտարարել է ուկրաինական պատերազմի պատճառով Ռուսաստանի դեմ սահմանված պատժամիջոցների անարդյունավետության մասին, փոխանցում է «Գրուզիա-օնլայն»-ը:

«Վրաստանի կողմից սահնմանվող պատժամիջոցները չեն կարող որեւէ դեր խաղալ… Պատժամիջոցները չեն աշխատում, եւ դա խոստովանում են բացարձակապես բոլորը։ Նույնիսկ եթե մենք դա չխոստովանենք, դա փաստ կմնա»,- ասել է Կոբախիձեն Առաջին ալիքի եթերում։

Նրա խոսքով՝ Վրաստանի իշխանությունները կենտրոնացած են սադրանքներից խուսափելու եւ պետությանը լուրջ վնաս պատճառող քայլեր չձեռնարկելու վրա։ «Այդ պրագմատիկ քաղաքականությունը կշարունակվի՝ մեր պետությունը, մեր երկիրը եւ մեր ժողովրդին պաշտպանելու համար»,- ասել է Կոբախիձեն։

Վարչապետ Իրակլի Ղարիբաշվիլին ավելի վաղ հայտարարել էր, որ Վրաստանը հակառուսական պատժամիջոցներին չի միանա, քանի որ դա հակասում է երկրի ազգային շահերին եի չի կարող դադարեցնել ռազմական գործողություններն Ուկրաինայում։