Իրանի իշխանություններն ԱՄՆ-ի պատժամիջոցները շրջանցելու միջոցներ են առաջարկել Ռուսաստանին

Իրանի իշխանություններն ԱՄՆ-ի պատժամիջոցները շրջանցելու միջոցներ եւ համագործակցություն են առաջարկել Ռուսաստանին։ Այս մասին «ՌԻԱ Նովոստիին» ասել է Իրանի Կենտրոնական բանկի միջազգային հարցերով ղեկավարի տեղակալ Մոհսեն Քարիմին։

Նրա խոսքով՝ Իրանը՝ հիմնվելով վերջին տարիներին պատժամիջոցների տակ գտնվելու իր հարուստ փորձից, անհրաժեշտ միջոցներ է ձեռնարկել ամերիկյան գերիշխանության եւ թշնամական երկրների ազդեցությունից դուրս գալու համար, ինչն առաջարկում է ռուսական կողմին։

Նրա խոսքով՝ այս ընթացքում Թեհրանին հաջողվել է տնտեսության բոլոր ոլորտներում սեփական ապրանքների արտադրություն իրականացնել։ Ընդ որում, Իրանը բարձր մակարդակի վրա է պահում նաեւ արտաքին առեւտրային գործառնությունները։ Նա նշել է, որ հաշվի առնելով Արեւմուտքի պատժամիջոցները եւ եվրոպական երկրների հետ առեւտուր անելու հնարավորության բացակայությունը՝ Իրանն ամբողջությամբ շրջվել է դեպի ասիական տարածաշրջան, մասնավորապես՝ Չինաստան։