Ով է վերահսկելու կամ պատասխանատվության ենթարկելու ուսուցիչներին ու այլ ոլորտների աշխատակիցներին, եթե նրանք հրաժարվեն պատվաստվել և 14 օրը մեկ չթեստավորվել

Նոր ուսումնական տարի արդեն մեկնարկել է, սակայն այդ հակահամաճարակային որոշ կանոնների ու միջոցառումների մասին ArmDaily.am-ը շարունակում է ահազանգեր ստանալ։

Մասնավորապես ուսուցիչներից մի քանիսն ահազանգում էին, որ իրենք պատվաստվել են Sputnik V պատվաստանյութով, սակայն արդեն երկրորդ չափաբաժինը ստանալու ժամանակն է, մինչդեռ պոլիկլինիկաներում պատվաստանյութը հասանելի չէ։

ArmDaily.am-ին առողջապահության նախարարությունից պարզաբանեցին, որ Sputnik V պատվաստանյութի երկրորդ չափաբաժնի համար պակասող խմբաքանակն արդեն ներմուծվել է, մինչև շաբաթվա վերջ այն հասանելի կլինի պոլիկլինիկաներում։ «Ընդ որում՝ Հայաստան է ներմուծվել հենց երկրորդ չափաբաժնի համար պակասող խմբաքանակը։ Մենք ստացել ենք ճիշտ այնքան դեղաբաժին, որ անհրաժեշտ է երկրորդ չափաբաժնի պակասուրդը լրացնելու համար»։

Ուսուցիչներից շատերը նաև անհանգստություն են հայտնում կապված հոկտեմբերի մեկից ուժի մեջ մտնող կարգի առնչությամբ, առ այն, որ ի թիվս այլ ոլորտների ներկայացուցիչների՝ նաև ուսուցիչները պետք է կամ 14 օրը մեկ ՊՇՌ թեստի բացասական պատասխան ներկայացնեն, կամ պատվաստված լինելու հավաստագիր։ Ուսուցիչները հետաքրքրվում են, որ եթե ուսուցիչը հրաժարվում է պատվաստվել, ապա ով և ինչ պատասխանատվության միջոց պետք է կիրառի, ով է իրականացնելու վերահսկողությունը։

Նախարարությունից տեղեկացրեցին, որ դա պետք է գործատուն որոշի, կամ միգուցե տեսչական մարմինը։ «Նախարարությունը պատժող կամ ստուգող մարմին չէ։ Նախարարությունը միայն ասում է, որ հիվանդությունը կանխարգելելու դեմ պայքարելու համար այս ճանապարհն ենք տեսնում, մենք միայն քաղաքականություն ենք մշակում։ Այսօրվա մեր մտահոգությունը գլոբալ համավարակն է, ամառվա սեզոնը նպաստեց փոքր ինչ թվային կրճատումներին, սակայն եթե տեսել եք ԱՀԿ-ի հայտարարությունը, որը մենք խուճապ չտարածելու համար անգամ չհրապարակեցինք, սակայն այդ հայտարարության մեջ ասվում էր, որ մարդկությանը 3 ամիս է մնացել, որովհետև գալիս է հերթական մեծ ալիքը, այսինքն կանխատեսումները լավատեսական չեն, ու նախարարությունը պետք է որոշակի քաղաքականություն մշակի՝ ելնելով իրավիճակից։ Այսինքն, գոնե մեծերը որ պատվաստված լինել, ուսուցիչները դասախոսները՝ ապա պաշտպանական շեմը որոշակի կմեծացվի ու քայլ առ քայլ կկարողանանք պայքարել հիվանդության դեմ՝ նվազեցնելու հիվանդացության դեպքերը։ Այսինքն, մեր խնդիրն է քայլեր ձեռնարկել, որպեսզի երրորդ ալիքը մեղմվի, չեմ ասում՝ վերանա, որովհետև տեսնում ենք, որ անգամ երբ օրինակ Վրաստանը փակել էր սահմանները՝ միևնույն է՝ հիվանդությունը տարածվում էր։ Հիմա մենք մատնանշել ենք ճանապարհը, բայց յուրաքանչյուր հիմնարկ ունի ներքին կանոնակարգերը, հենց այդ ներքին կանոնակարգերն էլ պետք է սահմանվեն պատասխանատվությունն ու սանկցիաները։ Ինչ վերաբերում է վերահսկողությանը՝ դրա համար էլ տեսչական մարմին կա»։

Մեզ ուղղվող հարցերից մեկն էլ վերաբերում էր նույն՝ 14 օրը մեկ կամ ՊՇՌ թեստ հանձնելուն, կամ պատվաստման հավաստագիր ներկայացնելու պահանջին, բայց արդեն ուսանողների համար պարտադիր լինելուն։ Շատերի համար պարզ չէր, թե արդյոք այդ պահանջը տարածվում է նաև ուսանողների վրա։ Նախարարությունից մեզ կրկին վերահաստատեցին, որ վերջնական իրավական ակտում ուսանողների համար վերոհիշյալ պահանջը հանված է։ Շահագրգիռ կողմերի հետ քննարկումների արդյունքում որոշում էր կայացվել, որ ուսանողների մասով պահանջը հանվելու է։