Աշխարհին ուղղված ՀՀ իշխանության ուղերձը՝ ԱՀ 1-ին և ՀՀ 2-րդ նախագահի անազատության մեջ լինելն է․ Կարեն Բեքարյան

Վերլուծաբան Կարեն Բեքարյանը ֆեյսբուքյան իր էջում շնորհավորական խոսքեր է հղել եռատոնի կապակցությամբ և նշել, որ վերջինս նաև աշխարհին ուղղված ուղերձի խորհուրդ ունի։ Ըստ նրա՝ Հայաստանի իշխանությունների ուղերձը՝ հաղթանակների կերտման անմիջական ու կարևորագույն ներկայացուցչի, Արցախի առաջին և ՀՀ երկրորդ նախագահի անազատության մեջ լինելն է: Արցախի իշխանություններինը՝ նորընտիր նախագահի երդմնակալության արարողությունը Շուշիում կազմակերպելու ազգանվեր ու ոգեշնչող որոշումը: Գրառումը՝ ստորև․

«Շնորհավորում եմ...

Հավերժ փառք՝ իրենց կյանքը հայրենիքի համար տված մեր հերոսներին:

Հավերժ փառք՝ իրենց կյանքը հայրենիքի համար տալու պատրաստ -ազատամարտի մեր բոլոր մասնակիցներին:

Հավերժ փառք՝ պատասխանատվություն ստանձնած ու հաղթանակ կերտած մեր առաջնորդներին:

Հավերժ փառք՝ զրկանքներին դիմացած ու հայրենիքը չլքած մեր ժողովրդին:

Հավերժ փառք՝ ժամանակին ու անշահախնդիր հայրենիքին ձեռք մեկնած սփյուռքի մեր հայրենակիցներին:

Հավերժ փառք՝ մեր հաղթանակներին տեր կանգնող սերունդ կրթած մեր ընտանիքներին ու մանկավարժներին:

Հավերժ փառք՝ մեր հայրենիքի պաշտպաններին...

Եռատոնը նաև աշխարհին ուղղված ուղերձի խորհուրդն ունի իր մեջ:

Հայաստանի իշխանությունների ուղերձը՝ հաղթանակների կերտման անմիջական ու կարևորագույն ներկայացուցչի, Արցախի առաջին և ՀՀ երկրորդ նախագահի անազատության մեջ լինելն է:

Արցախի իշխանությունների ուղերձը՝ նորընտիր նախագահի երդմնակալության արարողությունը Շուշիում կազմակերպելու ազգանվեր ու ոգեշնչող որոշումը:

Հայ ժողովրդի ուղերձը՝ վստահ եմ, պետք է լինի հետևյալը.
մենք տեր ենք մեր արժեքներին ու հաղթանակներին, և հաղթանակներ կերտած ու կերտելու պատրաստ ժողովուրդը - օր առաջ կհասնի իրեն արժանի առաջնորդության:

Իսկ ինչ վերաբերում է Հայաստանի ներկա թյուրիմացություն- իշխանությանը՝ համբերություն մեզ... սա էլ կանցնի... ու շատ շուտ:

Շնորհավորում եմ»։