Ռեկորդներ, խայտառակություն եւ գեղեցիկ գոլեր ընդամենը մեկ օրում

Ֆուտբոլի եվրոպական առաջնություններում շաբաթ կայացան մի շարք կարեւոր հանդիպումներ.

ԱՆԳԼԻԱ

«Չելսին» «Արսենալի» նկատմամբ ռեւանշի հասավ ֆուտբոլի Անգլիայի առաջնության առաջին շրջանում կրած 0:3 հաշվով պարտության համար: Պրեմյեր լիգայի 24-րդ տուրի կենտրոնական խաղը տեղի ունեցավ «Չելսիի» խաղադաշտում եւ ավարտվեց Անտոնիո Կոնտեի թիմի հաղթանակով՝ 3:1 հաշվով:

Խաղի սկզբնամասն անցում էր հավասար պայքարում: 13-րդ րոպեին «Չելսին» բացեց հաշիվը, սակայն գոլը ստացվեց սկանդալային: Տանտերերի իսպանացի պաշտպան Մարկոս Ալոնսոն գոլի դրվագում օդային պայքարի ժամանակ արմունկով հարվածեց իր հայրենակից Հեկտոր Բելերինի գլխին, բայց մրցավարը կանոնների խախտում չտեսավ այդ դրվագում: Հարվածն այնքան ուժեղ էր, որ Բելերինը չկարողացավ շարունակել խաղը: Առաջին խաղակեսում «Արսենալն» ունեցավ հաշիվը հավասարեցնելու հնարավորություն, թեեւ թիմերն ընդմիջման գնացին 1:0 հաշվի ժամանակ:

Երկրորդ խաղակեսի սկզբնամասում բելգիացի կիսապաշտպան Էդեն Ազարը, աչքի ընկնելով անհատական բարձր վարպետությամբ, կրկնապատկեց հաշիվը: Ազարը գնդակը ստացավ կենտրոնում եւ միայնակ «ճեղքեց» հյուրերի պաշտպանությունն ու հաշիվը դարձրեց 2:0: Այդ գոլից հետո «Չելսին» սկսեց խաղալ երկրորդ համարով, իսկ «Արսենալը» ստացավ տարածքային առավելություն, ինչը գոլի վերածել չէր հաջողվում: 85-րդ րոպեին գնդակը նաեւ երրորդ անգամ հայտնվեց հյուրերի դարպասում: Փոխարինման դուրս եկած Սեսկ Ֆաբրեգասն օգտվեց Պետր Չեխի սխալից եւ գրավեց իր նախկին թիմի դարպասը, բայց գոլը չտոնեց: Ավելացված ժամանակում «Արսենալից» հաշիվը կրճատեց փոխարինման դուրս եկած ֆրանսիացի հարձակվող Օլիվյե Ժիրուն:

Հերթական պարտությունը կրեց «Լիվերպուլը», որն այս անգամ 2:0 հաշվով զիջեց հետնապահներից մեկին՝ «Հալ Սիթիին»: Իսկ ահա «Տոտենհեմը» 1:0 հաշվով հաղթեց «Միդլսբրոյին» եւ հայտնվեց երկրորդ տեղում, ճիշտ է, առաջատարից ետ մնալով ինը միավորով: 

ԻՍՊԱՆԻԱ

Իսպանական Պրիմերայի 21-րդ տուրում «Բարսելոնան» սեփական դաշտում 3 անպատասխան գնդակ ուղարկեց Բիլբաոյի «Ատլետիկի» դարպասը:

«Բարսելոնայի» երկրորդ գոլն առաջին խաղակեսի վերջնամասում խփեց արգենտինացի հարձակվող Լիոնել Մեսին, որը տուգանային հարվածով 27-րդ գոլը խփեց կատալոնական ակումբի կազմում եւ գերազանցեց Հոլանդիայի հավաքականի նախկին պաշտպան Ռոնալդ Կումանի ռեկորդը: Անգլիական «Էվերտոնի» գլխավոր մարզիչը «Բարսելոնայում» հանդես է եկել 1989-1995-ը եւ, տուգանային հարվածով խփելով 26 գոլ, սահմանել ռեկորդ:

Լուիս Էնրիկեի թիմը մեկ միավոր է հետ առաջատար Մադրիդի «Ռեալից», որը 2 խաղ պակաս է անցկացրել: Ընդ որում, այսօրարքայական ակումբը, ամենայն հավանականությամբ, Վիգոյում եղանակային վատ պայմանների պատճառով չի կարող իր հանդիպումն անցկացնել «Սելտայի» հետ:

Եղանակային վատ պայմանների պատճառով հետաձգվել է նաեւ «Դեպորտիվո»-«Ռեալ Բետիս» խաղը:

Երեկ առաջատարներից «Ատլետիկոն» 2:0 հաշվով հաղթեց «Լեգանեսին»:

ՖՐԱՆՍԻԱ

Ֆուտբոլի Ֆրանսիայի առաջնությունը 23-րդ տուրի արդյունքում ունեցավ միանձնյա առաջատար: «Մոնակոն» կոլումբացի հարձակվող Ռադամել Ֆալկաոյի դուբլի օգնությամբ 3:0 հաշվով հաղթեց «Նիցային» եւ 52 միավորով բարձրացավ առաջին տեղ:

ՊՍԺ-ն 2:1 հաշվով արտագնա հաղթանակ տարավ «Դիժոնի» նկատմամբ եւ, վաստակելով 49 միավոր, բարձրացավ երկրորդ տեղ: Նույնքան միավոր ունի նաեւ «Նիցան», որը երրորդն է:

Ֆրանսիայի առաջնություն, 23-րդ տուր

«Մոնակո» - «Նիցա»՝ 3:0

Վալերի Ժերմեն, 47, Ռադամել Ֆալկաո, 60, 81

«Դիժոն» - ՊՍԺ՝ 1:3

Ժուլիո Տավարես, 31 – Լուկաս Մոուրա, 29, Տիագո Սիլվա, 81, Էդինսոն Կավանի, 84

ԳԵՐՄԱՆԻԱ

Գերմանական Բունդեսլիգայի 19-րդ տուրում երկրորդ տեղում գտնվող «Լայպցիգը» հյուրընկալվելիս նվազագույն հաշվով պարտվեց Դորտմունդի «Բորուսիային»: Միակ գոլն առաջին խաղակեսում խփեց գաբոնցի հարձակվող Պյեր-Էմերիկ Օբամեյանգը, որը 17 գոլով գլխավորում է ռմբարկուների ցուցակը:

 «Լայպցիգը» 4 միավոր զիջում է առաջատար Մյունխենի «Բավարիային», որն այս տուրում 1:1 հաշվով էր ավարտել Գելզենկիրխենի «Շալկեի» հետ տնային խաղը: «Բորուսիան» 34 միավորով բարձրացավ երրորդ տեղ:

ԻՏԱԼԻԱ

Իտալիայի առաջնությունում «Նապոլին» մրցակցի դաշտում 7:1 հաշվով հաղթեց «Բոլոնիային», թեեւ 26-րդ րոպեին մնաց տասը հոգով, դաշտից հեռացվեց Կալեխոնը: Ճիշտ է, այդ ժամանակ արդեն նեապոլցիները հաղթում էին 2:0 հաշվով: 

Ճիշտ է նաեւ, որ 32-րդ րոպեին թիմերը հավասարվեցին կազմերով: Այս հեռացումից հետո դաշտի տերերը կորցրին խաղի թելը եւ գերծոշոր հաշվով պարտություն կրեցին:

Այժմ «Նապոլին» երեք միավորով ետ է մնում առաջատար «Յուվենտուսից», բայց երկու խաղ ավելի է անցկացրել:

Top-News.am