Ե՞րբ է Նիկոլ Փաշինյանը ցավակցելու Գեորգի Կուտոյանի ընտանիքի անդամներին

Հունվարի 17-ին տեղի ունեցած ողբերգական իրադարձությունից անցել է մեկ օր: Գեորգի Կուտոյանի հարազատներին, ընտանիքի անդամներից ցավակցել են շատերը, այդ թվում նախկին նախագահ Սերժ Սարգսյանը, գործող նախագահ Արմեն Սարգսյանը, բայց տարօրինակ լռություն է պահպանում երկրի թիվ մեկ պաշտոն զբաղեցնող Նիկոլ Փաշինյանը:

Ե՞րբ է Փաշինյանը ցավակցելու, ո՞վ նրան թույլ չի տալիս մարդկային այդ քայլը, ի՞նչ ուժեր են, որ այսպես գցում են վարչապետի հեղինակությունը:

Տեղի ունեցածը ոչ միայն ողբերգություն է, այլ նաեւ ահազանգ մեր հասարակությանը, մեր ղեկավարությանը: ԱԱԾ նախկին ղեկավարը սպանվում է կամ ինքնասպանություն գործում, իսկ դեպքի վայրում քառասուն փամփուշտ է հայտնաբերվում, ընդ որում, ոչ թե ինչ-որ լուրերի, այլ ոստիկանության հաղորդման համաձայն, իսկ երկրի առաջին դեմքը լռում է:

Այս լռությունը ոչ պակաս մտահոգիչ եւ վտանգավոր է, որքան տեղի ունեցած ողբերգությունը: Ոմանք կարող են ասել, թե նրանք տարբեր քաղաքական ճամբարներից էին, բայց Փաշինյանը չպետք է իջնի այդ ոմանց մակարդակին: Ի վերջո, նա երկրի ղեկավարն է եւ ոչ թե ինչ-որ քաղաքական ուժի: 

Հիշեցման կարգով նշենք, որ 1992-ին, երբ հանկարծամահ եղավ Թուրքիայի նախագահ Թուրգութ Օզալը հուղարկավորությանը մասնակցեց նաեւ Հայաստանի այն ժամանակվա նախագահ Լեւոն Տեր-Պետրոսյանը:

Կուտոյանը մեր երկրի քաղաքացի էր, պարկեշտ մարդ, որը կարեւոր պաշտոն էր զբաղեցրել, ի վերջո 38 տարեկան երիտասարդ էր, որն իր գիտելիքներով եւ փորձով երկար կարող էր օգուտ բերել հայրենիքին, բայց Փաշինյանը լռում է, նա անգամ չի կարողանում ցավակցել:

Ի վերջո, բանականությունը հույս է հայտնում, որ Փաշինյանը ճիշտ կգնահատի իրավիճակը եւ կկարողանա ուժ գտնել ցավակցել Կուտոյանի ընտանիքի անդամներին: Հակառակ դեպքում վարչապետին հասկանալ հնարավոր չի լինի:

Այն բարոյահոգեբանական մթնոլորտը որն առկա երկրում, որն առկա էր սպանության պահին, նախօրեին մի առանձին վերլուծության նյութ է: Որոշ գիտունիկներ, իրենց խորամանկ եւ խելացի համարելով, իբր ԱԱԾ նախկին ղեկավար Արթուր Վանեցյանի մասին մտածելով կոչ են անում ուժեղացնել նրա անվտանգությունը, իսկ գրեթե նույն պահին Նիկոլ Փաշինյանի ընտանիքին պատկանող օրաթերթը հանդես է գալիս մի հոդվածով, որտեղ ԱԱԾ նախկին պետ Արթուր Վանեցյանին նույնիսկ մեղադրում են հեղաշրջման նախապատրաստման մեջ: Սրան գումարած նաեւ Փաշինյանի ընտանիքի անդամների անունից գրված մեղադրանքները Վանեցյանի եւ նրա ընտանիքի հասցեին:

Կարճ ասած, կեղտոտ մթնոլորտ: Այնպիսի կեղտոտ, որ անգամ Փաշինյանի թիմակիցները չեն ցանկանում մտնել այս խաղի մեջ եւ զարգացնել օրաթերթի հոդվածը կամ հնչեցված մեղադրանքները: 

Ավելացնենք նաեւ ԲՀԿ-ի եւ Գագիկ Ծառուկյանի ակտիվությանը իշխանությունները պատասխանում են մոտ հիսուն բիզնես միավորների հաշիվների վրա կալանք դնելով: Սա արդեն պառկեցնենք, ծեփենք, կտրենք շարքից է:

Միաժամանակ հարկ է ուշադրություն դարձնել երկրում բողոքի ալիքի նոր շերտերի ի հայտ գալով: Ընդ որում բոլոր նախադրյալներ կան, որ բողոքող շերտերը գնալով ավելանալու են:  

Հիմա տպավորություն է, որ փորձ է արվում վախի մթնոլորտ ստեղծել: Ընդ որում, նույնիսկ եթե չլիներ Կուտոյանի հետ տեղի ունեցածը, ավելի քան պարզ էր, որ երկրում ցանկանում են վախի մթնոլորտ հաստատել, մոռանալով, որ դրա համար չունեն ոչ անհրաժեշտ ռեսուրսներ, ոչ էլ աջակիցներ:

Վախի մթնոլորտի ներարկման փորձերը բացառապես վկայում են հենց իշխանության վախերի մասին: Ավելին, լրատվամիջոցների, հատկապես հեռուստաընկերությունների դեմ սկսված գրոհը դրա վառ ապացույցներից մեկն է: 

Եւ այսքանից հետո կրկին հարց՝ ե՞րբ է Փաշինյանը ցավակցելու Կուտոյանի ընտանիքի անդամներին, ո՞վ նրան թույլ չի տալիս գնալ այդ քայլին, ի՞նչ ուժ է, որ խաղում է նրա հեղինակության հետ:

Վարդան Մխիթարյան

Top-News.am