ԼՂ հակամարտության քաղաքական լուծումն անհնարին է առանց հրադադարի ռեժիմը հարգելու. ԵՄ ներկայացուցիչ

Արցախյան հակամարտությունը պետք է լուծվի խաղաղ ճանապարհով` առանց ռազմական ուժի կիրառման: Դա շատ կարեւոր է: Այս մասին Trend-ին հայտարարել է Հարավային Կովկասի հարցերով ԵՄ ներկայացուցիչ Հերբերթ Զալբերը, ով ավարտել է Ադրբեջան այցը:

Նրա խոսքով` տեղի ունեցած այցի ու երկրի ղեկավարության հետ հանդիպման ընթացքում կողմերը քննարկել են արցախյան հակամարտության լուծման հարցում վերջին փոփոխությունները: Նա հիշեցրել է, որ ԵՄ-ն անմիջական միջնորդ չի հանդիսանում արցախյան հակամարտության լուծման հարցում, բայց լիովին աջակցում է այդ ուղղությամբ ԵԱՀԿ Մինսկի խմբի ջանքերին:

«Չնայած մեդիատորների գործունեության հասցեին քննադատությանը` որոշում պետք է ընդունեն հակամարտության անմիջական կողմերը: Միջազգային հանրությունը կարող է միայն խորհուրդ տալ կամ առաջարկել, սակայն ոչ մի լուծում չի կարող պարտադրել: Հակամարտության քաղաքական լուծում կարելի է ձեռք բերել միայն հրադադարի ռեժիմը հարգելու դեպքում» - ասել է դիվանագետը:

Լուրեր Հայաստանից - NEWS.am