Սա էլ «նոր» Հայաստանի սիրելի Ալբանիան վեթինգից հետո

Ալբանիայում, «նոր Հայաստանի» սիրելի Ալբանիայում կիրակի տեղի ունեցան տեղական ինքնակառավարման մարմինների ընտրությունները: Բոլորը, այդ թվում եվրոպացի փորձագետները խոստովանում են, ընդգծում են, որ Ալբանիայում խորը, շատ խորը քաղաքական ճգնաժամ է:

Բնականաբար, այդ ճգնաժամը չէր կարող իր ազդեցությունը չունենալ ընտրությունների վրա: Ընտրությունը բոյկոտեց ընդդիմությունը: Ավելին, նախագահ Իլիր Մետան հայտարարեց, թե քվեարկությունն ապօրինի է եւ որեւէ լեգիտիմություն չի կարող ունենալ:

Ասենք, որ Ալբանիայում նախագահը նույն կարգավիճակն ու լիազորություններն ունի, ինչ Հայաստանում: Ինչ վերաբերում է բուն ընտրություններին, ապա ընտրատարածքների ճնշող մեծամասնությունում ընդամենը մեկ թեկնածու էր, որը ներկայացնում էր վեթինգն իրականացրած եւ երկիրը խորը քաղաքական ճգնաժամի մեջ գցած սոցիալիստական կուսակցությունը:

Սոցիալիստական կուսակցության առաջնորդ, երկրի վգարչապետ Էդի Ռաման հիացած է ընտրություններով, քաղաքական ճգնաժամը լուրջ չի համարում, իսկ ընտրությունները համարում է ժողովրդավարության հաղթանակ: Ի դեպ, նրան եւ իր կուսակցությանն ընդդիմությունը մեղադրում է կազմակերված հանցավորության հետ ունեցած սերտ եւ գնալով սերտաճող կապերի մեջ:

Ալբանիայում շարունակվող բողոքի գործողություններ են, որի մասնակիցները պահանջում են երկրի վարչապետի հրաժարականը: Նրան մեղադրում են դատական համակարգը փլուզելու, դատավորներին իր անմիջական ենթակայության տակ դնելու, Սահմանադրական դատարանը փլուզելու եւ հանցավոր շրջանակների հետ կապեր հաստատելու մեջ:

Իսկ վարչապետ Ռաման պնդում է. «Սա պատմական պահ է: Սա ավելին է քան ընտրությունը, սա նոր, սա ապագա Ալբանիայի ընտրությունն է, որը մենք ցանկանում ենք մեր երեխաների համար»: 

Վարչապետը չնկատելու է տալիս արդեն կես տարի շարունակվող քաղաքական ճգնաժամը: Չնկատելու է տալիս, որ ընդամենը մեկ շաբաթ առաջ մայրաքաղաք Տիրանայում տասնյակ հազարավոր մարդիկ պահանջում էին նոր ընտրություններ:

Վարչապետը հայտարարում է, թե ընդդիմությունը ցանկանում է խոչընդոտել Ալբանիայի մուտքը Եվրամիություն, ինչին ընդդիմությունը պատասխանում է, որ իրենք եւս կողմ են ԵՄ-ին անդամակցելուն, բայց դեմ են սոցիալիստական կուսակցության կողմից իրականացվող վտանգավոր եւ երկրի ողնաշարը կոտրող գործողություններին եւ դատական համակարգը մի մարդու տակ դնելուն:

Ալբանիայում վեթինգից հետո ճգնաժամը խորանում եւ խորանում է:

Վարդան Մխիթարյան

Top-News.am 

Բաժանորդագրվեք Top-News.am-ին Telegram-ում