Եվրոպան անտարբեր և անպատասխանատու է ԼՂ խնդրի հարցում. Վիկտոր Յուշչենկո

Ուկրաինայի նախկին նախագահ Վիկտոր Յուշչենկոն կարծիք է հայտնել, որ Եվրոպան բոլորովին անտարբեր և անպատասխանատու է անվտանգության խնդիրների, այդ թվում՝ Լեռնային Ղարաբաղի հիմնախնդրի նկատմամբ:

«Ինչո՞ւ է ՄԱԿ-ն այսքան անարդյունավետ աշխատում: Ուրիշ էլ ո՞ւմ է պետք դիմել, որպեսզի հակամարտությունները լուծում գտնեն: Եվրոպական մայրցամաքում առկա յոթ հակամարտություններից վեցը տեղի են ունենում Եվրոպայի արևելքում», - Azeri Daily-ին տված հարցազրույցում ասել է Յուշչենկոն:

Նրա կարծիքով՝ Արևելյան Եվրոպայի երկրներն ավելի շատ են տառապում, քան մյուսները՝ անվտանգության քաղաքականությունն ուժեղացնելու հարցում ԵՄ ուշադրության պակասի պատճառով:

«Ղարաբաղյան հակամարտությունը 30 տարի է ձգվում, հակամարտությունը Վրաստանում՝ 11 տարի, և արդեն հինգ ռազմական ներխուժում է եղել Ուկրաինայում: Նույնը Մերձդնեպրում է: Այսօրվա Եվրոպան լավագույն քաղաքական վիճակում չէ: Երկու-երեք եվրոպական երկրներ եվրոպական քաղաքականությունն օգտագործում են սեփական շահերի համար: Օրինակ՝ զավեշտալի է, որ նրանք «Հյուսիսային հոսք 2» նախագիծը նկարագրելիս խոսում են բացառապես տնտեսական մտադրությունների մասին: Նավթն ու գազը Մոսկվայի համար երբեք տնտեսություն չեն եղել: Դա մաքուր քաղաքականություն է», - եզրափակել է Յուշչենկոն: