Որևէ մեկից չենք վախենալու, որևէ մեկին չենք քողարկելու. Դավիթ Բաբայանը՝ Արցախի Պահպանողական կուսակցության մասին (տեսանյութ)

Արցախի պահպանողական կուսակցությունն արդեն պաշտոնապես գրանցվել է, տեղի է ունեցել հիմնադիր համագումարը: Այս մասին ֆեյսբուքյան ուղիղ եթերի ժամանակ հայտարարեց կուսակցության հիմնադիրներից Դավիթ Բաբայանը:

«Կուսակցությունը պաշտոնապես հիմնվել է, ընտրվել են կուսակցության նախագահ և ղեկավար կազմի անդամներ»,-ասաց նա: Ըստ վերջինիս՝ 504 գրանցված անդամ ունեն:

Դավիթ Բաբայանը պատմեց համագումարի մանրամասները, ապա ներկայացրեց իրենց առաջնահերթությունները. «Որևէ մեկից չենք վախենալու, որևէ մեկին չենք քողարկելու, պատրաստ ենք համագործակցության, բայց ոչ պրովոկատորների հետ: Չենք դիտարկում որևէ մի քաղաքական ուժ որպես մեզ թշնամի: Մրցակիցնե՞ր, այո, մրցակիցներ կան ու պետք է լինեն, որովհետև դա քաղաքական համակարգի համար անհրաժեշտություն է»,-նշեց նա:

Դավիթ Բաբայանը նկատեց՝ պատրաստվում են պայքարել քաղաքական կյանքում, ունեն համապատասխան գիտելիք ու պարկեշտություն դրա համար: «Պատրաստվում ենք երկարատև գործունեության, համառ պայքարի, բայց կրկնում եմ՝ մեզ համար որևէ մեկը թշնամի չէ»,-ասաց նա:

Առավել մանրամասն՝ տեսանյութում: