Սերժի անունն իմ մոտ մի տուր. գյումրեցիները՝ ՀՀԿ-ի կեղծարարության մասին

Նախընտրական քարոզարշավին մնացել է ընդամենը մեկ օր. ապրիլի 1-ը լռության, իսկ 2-ը՝ ընտրության օր է: Պատգամավորի որոշ թեկնածուների ակտիվ կաշառքի բաժանմանը, վճարովի եթերներին, պատվիրված ռեպորտաժներին զուգահեռ՝ գյումրեցիներից շատերին շարունակում են անհայտ մնալ ընտրական կարգն ու քաղաքական ուժերի նախընտրական ծրագրերը:

Գյումրեցիների շրջանում փորձեցինք հետաքրքվել, թե ապրիլի 2-ից հետո, որ կուսակցություններին կամ դաշինքներին կցանկանան տեսնել նոր ձեւավորվող խորհրդարանում եւ՝ ինչու:

«Մաքուր մարդ պետք է մտնի խորհրդարան: Այսինքն, ժողովրդի մասին մտածող, մեզի պես մարդկանց օրվա գրամ հացին չկպնող: Մենք մեզի հաց տվողին չենք հարգում: Մի Ծառուկյան ունենք, բայց իրեն լավ տեղ չենք տալիս: Ես շենքի 2-րդ հարկում եմ ապրում, մի ծառ չունեմ, այգի չունեմ, բայց տեսնում եք, թե Ծառուկյանը Արարատյան դաշտում ինչ պայմաններ է ստեղծում մարդկանց համար: Շատ ուրախ եմ, որ խաղողագործին կհասնի, գյուղացուն կհասնի: Սաղ երեսից հայելի են ձեւանում, բայց տակից՝ ածելի են: Ասում են՝ արի թրաշեմ: Ծառուկյանը, եթե թրաշի էլ՝ չի կտրի»,- ասում է գյումրեցի թոշակառուներից մեկը:

«Ես ուզում եմ, որ Ծառուկյանը անցնի: Նա միակ պաշտոնավորն է, որ օգնում է ժողովրդին: Առաջին տեղով Ծառուկյանը կանցնի, Հանրապետականը կանցնի, Ելքը կանցնի, մեկ էլ դաշնակցականները»,- իր կանխատեսումները ներկայացրեց մեկ այլ տարեց գյումրեցի:

Գյումրեցիների հետ զրույցից պարզ դարձավ, որ վերջիններս ցանկանում են ԱԺ-ում տեսնել այնպիսի պատգամավորների, ովքեր թաղային հեղինակության փոխարեն, ազգային հերոսներ են:

«Առաջ ընտրություններին հանգիստ էր, հմի լրիվ ագրեսիվ են դարձել: Օրը տասը հատ դանակահարություն կեղնի: Հմի ինչքան որ թալանչի, գող, ավազակ կա կառավարության եւ Ազգային ժողովի անդամներ են: Հերոս մարդիկ պտի մտնին Ազգայի ժողով, ովքեր կռվել են, սրտները կցավա էս երկրի համար: Բաբայան Սամոն երկիր է ազատագրել թուրքից, բայց էսօր գաղութ են գցել»,- ՀՀԿ-ից եւ Սերժ Սարգսյանից խիստ վրդովված ասած մի գյումրեցի եւ վրդովված ավելացրեց. «Իմ մոտ Սերժի անունը մի տուր»: 

«Պետք է հասկանանք, թե ովքեր են արժանի խորհրդարան մտնելու համար: Եկել է ժամանակը հասկանանք, որ ասֆալտ փռելու խոստում տվողները խորհրդարանի հետ կապ չունեն: Նրանք երեւի շփոթել են դռները: Մեզ այնպիսի պատգամավորներ են պետք, որ նախընտրական շրջանում չասեն այլ բան, իսկ ընտրվելուց հետո կոալիցիա կազմեն լրիվ ուրիշ ուժերի հետ»,- ասաց գյումրեցի իրապավաշտպան ՀԿ-ներից մեկի ղեկավարը:

Գյումրեցիները նշում էին, որ երազում են, ցանկանում են, որ խորհրդարանում ՀՀԿ-ն մեծամասնություն չկազմի: 

«Ես որոշ ընդդիմադիր ուժերի, որոնց ծրագրերում տեսնում եմ Հայաստանի տնտեսության կայունացման կետեր, ցանկանում եմ, որ դրանք անցնեն խորհրդարան: Կուզեմ Ազգային ժողովում տեսնել Րաֆֆի Հովհաննիսյանին, Արմեն Մարտիրոսյանին, Նիկոլ Փաշինյանին, Արամ Սարգսյանին, Ծառուկյանին, Սեյրան Օհանյանին, լավ կլիներ, որ Փոստանջյանը նորից հետ գար»,- այս թեմայի վերաբերյալ նման կարծիք հայտնեց գյումրեցի արվեստագետներից մեկը:

Գյումրիում, չնայած կարծում են, որ Սերժ Սարգսյանը եւ կառավարող ՀՀԿ-ն ցանկացած քայլի կգնան կրկին վերարտադրվելու եւ իշխանության գալու համար:

«Մարդ իր քրտինքով ձեռք բերածը պահում-պահպանում է, Հանրապետականը ընչի՞ պտի իր ձրի ձեռք բերածը զիջի, թողնի գնա»,- «արդյոք ՀՀԿ-ն ընտրության արդյունքները չի կեղծի եւ կհամակերպվի իրականության հետ», մեր հարցին ի պատասխան նշեց կարկանդակներ վաճառող տղամարդը եւ գոռալով՝ «տա՜ք պերաշկիներ»,– շարունակեց իր աշխատանքը Գյումրու քար ու քանդ փողոցներով: Նա չթաքցրեց, որ պատրաստվում է ընտրակաշառք վերցնել եւ տարբերություն չի տեսնում բոլոր քաղաքական ուժերի միջեւ:

«Չեմ հավատում, որ իշխող ՀՀԿ-ն կզիջի իր դիրքերը: Ինձ թվում է, որ նրանք նույնիսկ երկիրը կվաճառեն, բայց իշխանություն լինելուց չեն հրաժարվի: ՀՀԿ-ի մոտ բացակայում է քաղաքակրթությունը: Երեւի արժանապատիվ պարտվելու գաղափարի բացակայությունը Հանրապետականի անդամների մոտ արմատական է: Մտածում են միայն օրվա գողոնի մասին»,- ասաց Գյումրու հասարակական տրանսպորտի վարորդներից մեկը:

«Քիչ են կերել, նորից կուզեն շատցնեն»,- գյումրեցիներից մեկը, մեր այն հարցին, թե ինչու՞ է կառավարող ՀՀԿ–ն ցանկանում վերարտադրվել, այս պատասխանն է տալիս:

Ընդդիմադիր համարվող գյումրեցիները վճռականորեն նշում են, որ թույլ չեն տալու ընտրակեղծարարության ոչ մի մեթոդի կիրառման:

«Տեսա՞ք այս մի քանի օրը ինչ վարչական ռեսուրս օգտագործվեց: Այդ ամենը արվում է հերթական անգամ վերարտադրվելու համար: Հիմա այն, ինչ չի մտնում մարդու ուղեղում, դրանք բոլորը օրինականացվում են: Կաշառք բաժանելը, ձայն հավաքելը, ցուցակ կազմելը օրինականացվում է: Տնօրենի՝ աշխատանքի ժամանակ կուսակցական գործերով զբաղվելը՝ օրինականացվում է»,- նշեց դիտորդական աշխատանք իրականացնող կազմակերպություններից մեկի համակարգողը:

«Սերժ Սարգսյանը պետք է հեռանա: Եկել, ասում են՝ անվտանգություն, ի՞նչ անվտանգության մասին է խոսքը»,- եզրափակեց բանասիրական գիտությունների թեկնածու մեր զրուցակիցը:

Գյումրեցիների կարծիքներից կարելի է ենթադրել, որ Հանրապետական կուսակցությունը, Սերժ Սարգսյանը եւ նրա առաջադրած 13 ռեյտինգային թեկնածուներն արդեն իսկ պարտվել են Գյումրիում: Նրանց օգտին հատուկենտ քվե է լինելու: ՀՀԿ-ի հույսը շարունակում են մնալ հանգուցյալները, սովից ու աղքատությունից ճարահատյալ արտագաղթածները եւ վարչական ռեսուրսը, որը սակայն վերջին շրջանում Գյումրիում եւս տհաճ անակնկալներ է մատուցում Սերժ Սարգսյանին:

Դավիթ Գասպարյան

Գյումրի