Եւ կրկին շաբաթօրյակ, եւ կրկին սուտ ու կեղծիք

Հայկ Մարությանը կոչ է արել երեւանցիներին մասնակցել շաբաթօրյակին, ասելով, թե ընտանիքի հետ մասնակցելու է այդ միջոցառմանը: «Սա շատ լավ հնարավորություն է, որպեսզի միասին այդ մեկ օրվա ընթացքում բավականաչափ մեծ գործ անենք: Միասին լծվենք գործի եւ մաքրենք մեր քաղաքը»,- ասել է նա:

Հիմա ուշադրություն. համաքաղաքային շաբաթօրյակը քաղաքի տարբեր հատվածներում կուղեկցվի տոնական միջոցառումներով: Սա արդեն լիակատար վերադարձ է ոչ թե խորհրդային տարիներ, այլ երեսուն-քառասունական թվականներ, երբ բանվորներն ու գյուղացիները շաբաթօրյակին աշխատում էին զուռնա-դհոլի ուղեկցությամբ: 

Այսպիսով, նույնիսկ իշխանափոխությունից հետո մենք հրաժեշտ չտվեցինք կեղծիքով լի, ստրկատիրական եւ ճորտատիրական կարգերը հիշեցնող, տիպիկ սովետական շաբաթօրյակին:

Քանի դեռ մենք չենք հասկացել, որ շաբաթօրյակ անելով մենք կառչած ենք մնալու աղքատությանը, ստին եւ խաբեությանը, տեղից հաստատ առաջ չենք շարժվի: Քաղաքը մաքուր պահելու բազմաթիվ միջոցներ եւ եղանակներ կան, որոնք կիրառում է քաղաքակիրթ աշխարհը:

Ոչ մի զարգացած երկրում մարդկանց շաբաթ օրը փողոցները մաքրել չեն տալիս, բժիշկներին ստորացնելով աղբ հավաքել չեն ստիպում, դպրոցականներին փոշին այս ու այն կողմ սրբել չեն ստիպում:

Քաղաքակիրթ աշխարհում հավաքարարին վճարում են եւ հետեւում են, որ նա կատարի իր աշխատանքը, իսկ աղբը փողոցում կամ զբոսայգում թափողին տուգանում են: Դպրոցի կամ հիվանդանոցի պատուհանները մաքրում են ոչ թե բուժքույրերն ու բժիշկները, այլ սանիտարները:

Ամոթ է, վերջ տվեք այս խայտառակ շաբաթօրյակներին: Առանց այս խայտառակ միջոցառմանը հրաժեշտ տալու ոչ առաջընթաց, ոչ էլ զարգացում կլինի: 

Ի դեպ, այլեւս չխոսեք հեղափոխության մասին, չասեք, թե հեղափոխություն է եղել: Եթե եղած լիներ, գոնե շաբաթօրյակ չէիք անի:

Վարդան Մխիթարյան

Top-News.am