Ոստիկանը մե՞րն է, թե՞ ...

Բավական երկար ընդմիջումից հետո հայ ոստիկանը, հայ կարմիրբերատավորը, մեղմ ասած, անհամաչափ ուժ կիրառեց հայ մարդու դեմ: Ինչպես ասում են, ադրբեջանցին տեսավ ուրախացավ, զանգեց Թուրքիա եւ պատմեց: Իսկ եթե ավելի լուրջ, ապա կրկին անգամ ժողովուրդը համոզվեց կամ նորից հասկացավ, որ ոստիկանը բոլորովին էլ իրենը չէ:

Եւ այսպես, ինչո՞ւ կառավարությունը որոշեց կարմիրբերետավորներին հանել մի քանի տասնյակ ցուցարարների դեմ, երբ դրա անհրաժեշտությունը բոլորովին չկար:

Այս հարցի պատասխանը կստանանք, եթե տիրապետենք իշխանությունների վարկանիշի մասին իրական տվյալներին: Համառ լուրեր են շրջանառվում, որ բոլոր գաղտնի եւ անաչառ ուսումնասիրությունները ցույց են տալիս, որ այսօր կառավարությանն աջակցում է հայաստանցիներևի հազիվ մեկ երրորդը:

Հազիվ էր վերանում կամ վերացել իրավապահ մարմինների եւ ժողովրդի միջեւ առկա անջրպետը եւ ընդամենը մի բախումը ամեն ինչ փլուզեց եւ վերականգնեց նախկին իրավիճակը: Ափսոս: Փաստորեն կառավարությունը, երկրի ղեկավարությունը փորձում է վարկանիշի կարուստը հետ բերել կամ փոխհատուցել ինքնահսատատվելով:

Այս դեպքում ինքնահաստատվելու միջոց հանդիսացավ ուժի անհամաչափ կիրառումը: Գուցե ինչ որ մեկը հորդորել է, որ իշխանությունները պետք է այսուհետ ներկայանան ուժեղ տղայի կերպարով: Ո՞ւր կտանի այս քայլը, այս նախաձեռնությունն առայժմ դժվար է ասել, բայց որ իշխանություններն ուզում են հանդես գալ կոշտ եւ խիստ ղեկավարի նոր իմիջով՝ ակնհայտ է:

Եթե այս ամենն իրականություն է, եթե իրոք իշխանությունները ցանկանում են հանդես գալ նոր իմիջով, ապա կարելի է սպասել, որ ուժի ցուցադրման հերթական գործողությունը շատ չի ուշանա:

Վահրամ Գեւորգյան

Top-News.am