Ցինիզմը նոր Հայաստանում

Միանգամից ասենք, որ յուրաքանչյուր մարդ, որն աշխատում է լավ, որն աշխատում է նվիրված պարգեւավճար ստանալու իրավունք ունի, բայց...

Հիմա այդ բայցի մասին: Երբ մարզպետն իրեն եւ իր թիմակիցներին կամ միայն թիմակիցներին պարգեւատրում է այն դեպքում, երբ մարզերը թաղված են խնդիրների մեջ, երբ մարզերում խելքը գլխին մի գործ, անգամ մի նախագիծ չի կազմվել, երբ մարզերի բնակիչները թաղված են վարկերի եւ աղքատության մեջ, մարզպետարանի աշխատակիցներին, ղեկավար կազմին պարգեւատրելը սովորական ցինիզմ է:

Հատուկ նորաթուխ մարզպետների, պատգամավորների, խմբակցության ղեկավարների, նախարարների, բոլոր-բոլորի համար ընդգծենք, որ ցինիզմն այն է, երբ բացահայտ քամահրական վերաբերմունք է ցուցաբերվում հասարակական բարոյականության նորմերին, մշակութային արժեքներին եւ պարկեշտության վերաբերյալ պատկերացումներին: 

Ցինիզմն այն է, երբ բացակայում է կարեկցանքը, ամոթը, խղճահարությունը:  Ի դեպ, գիտնականները, ընդ որում ոչ միայն բրիտանացի, պնդում են, որ ցինիզմը հատուկ է նրանց, ովքեր իրենց անձնական նպատակների իրականացման ճանապարհին պատրաստ են դիմել ցանկացած միջոցի եւ եղանակի: 

Եւ երբ մարզում աղքատություն է, իսկ մարզպետը իր կես տարի կամ երկու կամ երեք ամիս աշխատատած թիմակիցներին եւ իրեն բավական մեծ գումար պարգեւավճար է հատկացնում, ապա գործ ունենք ամենասովորական ցինիզմի հետ:

Երբ Վայոց ձորի մարզպետն ասում է, թե իրեն չի պարգեւատրել միայն նրա համար, որ դրանից հետո ուրիշներին պարգեւատրելու գումար չէր մնա, ապա դա հենց ցինիզմ է:

Ցինիզմ է նաեւ Լիլիթ Մակունցի հայտարարությունը, թե պարգեւավճարները հատկացվել են օրենքի սահմաններում: Ի դեպ, ցինիզմ է նաեւ Մակունցին կառավարող ուժի խմբակցության ղեկավար նշանակելը:

Երբ ԱԺ փոխնախագահ Լենա Նազարյանը հայտարարում է, թե մարզպետները պարգեւատրել են իներցիայի ուժով, ապա սա եւս ցինիզմ է: Ի դեպ, Լենա Նազարյանը նման հայտարարություն արել է, երբ իրեն սովորական հեռախոսով չեն ձայնագրել կամ նկարել:

Ցինիզմ է նաեւ պարգեւատրումների վերաբերյալ Սուրեն Պապիկյանի եւ այս թեմայով արտահայտված մարզպետների հայտարարությունները:

Չմոռանանք Արարատ Միրզոյանին, որը մի քանի օր առաջ ցինիկաբար հայտարարեց, թե օրենքները, սահմանադրությունը նախկինում վատն էին, քանի որ լավերը չէին ղեկավարում, իսկ հիմա լավն են, քանի որ բարի մարդիկ են իշխանության:

Իսկապես բարի մարդիկ են: Պատկերացնում եք որքան պարգեւավճարներ կհատկացնեին, եթե չար լինեին:

Եւ միայն չասեք, իսկ լա՞վ էր, որ Սերժի ժամանակ այս էին անում, այն էին անում: Չասեք, քանի որ շատ վատ էին անում, եւ դրա համար էլ հասարակական դժգոհությունը հասել էր գագաթնակետին, բայց նրանց արածը դեռ հիմք է չէ նոր Հայաստանում ցինիզմը զարգացնելու եւ նրանց արածները կրկնելու համար: 

Մեկ անգամ եւս կրկնենք, երբ պարգեւատրվեն կոնկրետ գործի, կոնկրետ խնդիրների լուծման ուղիներ առաջարկելու, երկարամյա օրինակելի եւ լավ աշխատանքի համար, հանրությունն այսքան աղմուկ չէր բարձրացնի:

Իսկ հիմա Նիկոլ Փաշինյանով հիացողները կամ նախկինում նրանով հիացողները սպասում են, թե նա ինչ է մտածում այս պարգեւատրումների, Մակունցի, մարզպետների, Լենա Նազարյանի կամ Սուրեն Պապիկյանի եւ լրագրողների մասին: 

Հակոբ Ասատրյան

Top-News.am