Եղեգնաձորցիներ. Սերժին ընտրեմ՝ ի՞նչ անեմ

Վայոց Ձորի մարզկենտրոն Եղեգնաձորը արդեն մեկ շաբաթ է ընդունում եւ ճանապարհում է տարբեր քաղաքական ուժերի, ռեյտինգային թեկնածուների: Եղեգնաձորցիները կես կատակ, կես լուրջ ասում են՝ քաղաքը շուտով մարզկենտրոնից մայրաքաղաքի է վերածվելու՝ բազմամարդ լինելու պատճառով: Եղեգնաձոր քաղաքը զբոսաշրջային կենտրոն չէ, եւ այստեղ հազվադեպ են այսքան հյուրեր ունենում:

Եղեգնաձորը խորհրդարանական ընտրությունների նախընտրական քարոզչության շրջանակներում առաջինը հանրապետական կուսակցությանն է ընդունել: Կառավարող ուժի եւ գործազուրկ եղեգնաձորցու հանդիպումից անցել է արդեն մեկ շաբաթ: Այստեղ դեռ զարմանքով են խոսում ու յուրաքանչյուր անծանոթի պատմում, թե ինչպես են պետական կառույցների «շեֆերը» իրենց ենթականերին, նրանց ընտանիքի անդամներին, նույնիսկ երեխաներին պարտադրել գալ, ներկա գտնվել վարչապետի հետ հանդիպմանը, ժպտալ, ծափ տալ եւ ցուցապաստառներ պահել:

Պատմում են, բայց չեն ասում, թե ինչու են վախից ելնելով եկել եւ հանդիպել ՀՀԿ-ականներին: Նրանք այդ հարցի պատասխանը չունեն:

«Դպրոցներից, մանկապարտեզներից, քաղաքապետարանի ու մյուս տեղերից մարդկանց, երեխեքին բերին, լցրին, ասին՝ ուրախ, խնդալով, ծափ տալով վարչապետի ու հանրապետականի նկարը բարձր պահեք: Մարդիկ վախենում են, մարդկանց մեջ վախ կա, չեն ուզում օրվա հացից կտրվեն: Ինչ ասում են, գլխները կախ անում են»,- մեզ հետ զրույցում ասաց Եղեգնաձորի բնակիչ Արայիկ Ներսիսյանը, որը նախապատվությունը տալիս է ընդդիմադիր ուժերին, բայց հստակ որոշում դեռ չի կայացրել, կամ կայացրել է, բայց գաղտնի է պահում:

Եղեգնաձորում դժգոհում են, որ տասը տարի է քաղաքում որեւէ դրական փոփոխություն չեն նկատում: «Քոչարյանից հետո քաղաքում քարը քարի վրա չեն դնում»,- անկեղծացավ մի եղեգնաձորցի, որը որոշել է չմասնակցել ընտրություններին: Իսկ ահա նրա կողքին կանգնած միջին տարիքի տղամարդիկ շեշտեցին, թե որոշել են Սեյրան Օհանյանին քվեարկել: 

«Ինձ իրենց կաշառքը պետք չէ, իրանց ողորմությունը ինձ պետք չի, ինձ իմ արդար ավելի աշխատանքն էլ է հերիք, իրենք էլ թող ավել անեն, բայց արդար լինեն: Ես ուզում եմ հանդիպել Սեյրան Օհանյանի հետ: Ինքը ինձ չի ճանաչում, բայց ես իրեն շատ լավ եմ ճանաչում: Ես միայն Սեյրան Օհանյանին եմ վստահում, նա ազնիվ է աշխատել, նրա նման ազնիվ մարդ չկա»- ասում է Եղեգնաձորի քաղաքապետարանի սանմաքրման բաժնի աշխատակիցներից մեկը:

Եղեգնաձորցին 2017 թվականի համապետական ընտրություններին վճռականորեն է տրամադրված: Այստեղ նպատակադրվել են իշխանափոխություն անել:

«Ես 80 տարեկան մարդ եմ, բայց դեռ ոչ մի բան չեմ տեսել, որ հանրապետականը անի… Մեր իշխանությունը պետք է փոխվի, որ փոխվի՝ ժողովրդի վիճակը լավ կլինի: Ով ուզում է թող գա իշխանության գլուխ, բայցի այս իշխանություններից, մենք իրենց դեմ ենք»,-ասում է եղեգնաձորցի ծերունին:

Զրուցում ենք քաղաքի տարբեր տարիքի, զբաղմունքի տեր մարդկանց հետ, փորձում պարզել, թե ում են իրենց ձայնը տալու: Մեծ մասը չի անկեղծանում, իսկ անկեղծացողները նշում են «Ծառուկյան դաշինքի», «Օհանյան-Րաֆֆի-Օսկանյան» դաշինքի անունները, բայց չգտանք մեկին, ով կասեր, թե ձայն է տալու ՀՀԿ-ին:  

«Ես Օհանյանին եմ սիրում, իրան եմ ընտրելու, Սերժին ընտրեմ ի՞նչ անեմ: 76 տարեկան եմ տան մեջ մենակ եմ մնացել, երեխաներս լրիվ թողել, գնացել են երկրից՝ աշխատանք չլինելու պատճառով»,- ասում է եղեգնաձորցի տիկին Հասմիկը:

Դավիթ Գասպարյան

Եղեգնաձոր