Ժողովուրդը կապստամբի, եթե ինձ իմպիչմենտ հայտարարեն

ԱՄՆ նախագահ Դոնալդ Թրամփը Reuters գործակալությանը տված հարցազրույցում հայտարարել է, որ չի անհանգստանում հնարավոր իմպիչմենտի պատճառով, քանի որ «ոչ մի վատ բան» չի արել և օրենք չի խախտել, գրում է РИА Новости-ն:

«Դժվար է իմպիչմենտ հայտարարել մեկին, ով ոչ մի վատ բան չի արել և ստեղծել է մեր երկրի պատմության մեջ հզորագույն տնտեսությունը: Ես ընդհանրապես մտահոգված չեմ, ո՛չ: Կարծում եմ՝ ժողովուրդը կապստամբի, եթե դա տեղի ունենա», - հայտարարել է Թրամփը:

Ավելի վաղ Կոնգրեսի Ներկայացուցիչների պալատի բարձրաստիճան անդամ Ադամ Շիֆը հայտարարել է, որ նախագահ Թրամփի՝ ճաղերի հետևում հայտնվելու հեռանկարն իրական է: Կոնգրեսականը չի բացառել, որ նախագահի պաշտոնը լքելու նույն օրը Թրամփը կարող է բանտում հայտնվելու սպառնալիքի առաջ կանգնել, քանի որ նրա նախկին անձնական փաստաբան Մայքլ Քոհենի վերջերս արած խոստովանությունները վկայում են, որ նախագահն իրոք հանցանք է գործել:

Քոհենը պատմել էր, որ Թրամփի անմիջական ուղղորդմամբ պայմանավորվել է National Enquirer-ի ղեկավարության հետ նախկին երկու պոռնոաստղերից Թրամփի հետ սեքսուալ կապի մասին պատմող պատմությունների հրապարակման իրավունքը գնելու շուրջ: Թրամփի թիմը փորձել է այնպես անել, որ պատմությունները չտարածվեն մամուլում:

Հայտնի է, որ դա տեղի է ունեցել 2016թ. նախընտրական քարոզարշավի ընթացքում: Թրամփն ամեն ինչ արել է իրեն վարկաբեկող նյութերի հրապարակումը կանխելու համար: Երկու պոռնոաստղն էլ խոշոր գումար են ստացել Թրամփից ու համաձայնել լռել: