Ներգաղթյալների «քարավանը» Մեքսիկայում մոտեցել է «մահվան ճանապարհին», որտեղ հարյուրավոր մարդիկ են անհետացել (լուսանկարներ)

Հարավային Ամերիկայից դեպի Միացյալ Նահանգների սահման շարժվող ներգաղթյալների 4.000 հոգանոց «քարավանը» մտել է մեքսիկական Վերակրուս նահանգ, որտեղ հանցավորության մակարդակը շատ բարձր է և որտեղ վերջին մի քանի տարվա ընթացքում նարկոկարտելները հարյուրավոր մարդկանց են առևանգել:

Ինչպես նշում է Daily Mail-ը, նրանք մոտեցել են այն ճանապարհին, որը հայտնի է որպես «մահվան ճանապարհ»: Այն անցնում է շաքարեղեգի ու մրգային դաշտերով: Նարկոկարտելների անդամներն այս հատվածում դարանակալում են մարդկանց, առևանգում նրանց ու հետո փրկագին պահանջում: Վերջին տարիներին այստեղ հարյուրավոր մարդիկ են անհետացել:

Նշվում է, որ ներգաղթյալների առաջին «քարավանը» գտնվում է ԱՄՆ սահմանից մի քանի հարյուր կիլոմետր հեռավորության վրա:

Ներգաղթյալների խոսքերով՝ իրենք փախչում են իրենց երկրներում տիրող աղքատությունից ու բռնությունից, սակայն չի բացառվում, որ փախուստի ճանապարհին այլ երկրում դառնան բռնության զոհ:

Հայտնի է, որ ներգաղթյալները հիմնականում Հոնդուրասից են, Գվատեմալայից, Սալվադորից ու Նիկարագուայից: 

Հիշեցնենք, որ Հարավային Ամերիկայից դեպի Միացյալ Նահանգների սահման է շարժվում ներգաղթյալների միանգամից երկու «քարավան»: Առաջինը ձևավորվել է մի քանի շաբաթ առաջ՝ Հոնդուրասում: «Քարավանում» կա մոտ 14.000 մարդ՝ հոնդուրասցիներ ու Գվատեմալայի բնակիչներ: Նրանց մի մասը գտնվում է Գվատեմալայում, իսկ մյուս մասն արդեն Մեքսիկայի տարածքում է:

Ներգաղթյալների մյուս «քարավանն» ավելի փոքրաթիվ է ու ձևավորվել է Էլ Սալվադորում:

Հայտնի է, որ այս մարդիկ փախչում են իրենց երկրներում սոցիալական ծանր վիճակից ու համատարած բռնությունից:

Այնուհանդերձ՝ ԱՄՆ նախագահ Դոնալդ Թրամփը հայտարարել է, որ «քարավանների» շարժն «անիմաստ է», քանի որ ինքը թույլ չի տա նրանց հատել ԱՄՆ պետական սահմանը: