Փարիզի օդանավակայանում երկու ինքնաթիռներ իրար են բախվել

Փարիզի Շառլ դը Գոլի անվան օդանավակայանում ամերիկյան ինքնաթիռը թևով բախվել է ֆրանսիական օդանավերից մեկին: Այս մասին հաղորդում է РИА Новости-ն՝ հղում անելով Parisien թերթին:

Միջադեպը տեղի է ունեցել չորեքշաբթի՝ հոկտեմբերի 31-ին: Բախման հետևանքով տուժածներ չկան:

Հաղորդվում է, որ Air France ավիաընկերությանը պատկանող ինքնաթիռը դուրս է եկել կայանատեղիից, սակայն կանգ է առել դեպի թռիչքուղի տանող ճանապարհին: Այդ ժամանակ ինքնաթիռի մոտով անցնելիս է եղել Delta Air ավիաընկերությանը պատկանող օդանավը, որն էլ թևով բախվել է առաջինին:

Air France-ի օդանավի՝ դեպի Սենթ Մարտեն թռիչքը չեղարկվել է. այն կկայանա նոյեմբերի 1-ին: Ավիավթարների հետաքննությունների ֆրանսիական բյուրոն հետաքննություն է սկսել: