Գողերն օգնել են հնագետներին գտնել XVI դարի տան մնացորդները

Գողերը, ովքեր գյուղական խանութից տարել են բանկոմատը, գիտնականներին օգնել են հայտնաբերել XVI դարի տան մնացորդներն ու Թյուդորների կառավարման ժամանակաշրջանի արտեֆակտները՝ տեղեկացնում է N+1-ը։

Հնագետներն ուսումնասիրել են հանցագործների կողմից վնասված շինությունն ու այնտեղ գտել միջնադարյան օջախ, որտեղ եղել է երկու բռնակով կաթսա՝ դրված եռոտանու վրա։ Հավանաբար, նման կաթսաները հորում էին տան մուտքի մոտ՝ չար ուժերից տունը պաշտպանելու համար։

Հանցագործներն ավտոմեքենայով կոտրել են խանութի ապակիները, պոկել ներսում գտնվող բանկոմատը եւ փախել այլ մեքենայով։ Սրա հետեւանքով շենքի դիմապատը փլվել է, եւ այն անհրաժեշտ է եղել վերանորոգել։ Մինչ վերականգնողական աշխատանքները սկսելը սեփականատերերը հրավիրել են հնագետների, որպեսզի նրանք ուսումնասիրեն հին տունն ու պեղումներ կատարեն։ Հայտնի էր, որ տունը 1520 թվականին են կառուցել։ Հավանաբար այն հարուստ առեւտրականի է պատկանել, քանի որ գտնվում էր ամենատեսանելի տեղում, եկեղեցու դիմաց։