Մոնղոլիայի նախագահը սպառնում է հացադուլ հայտարարել

Մոնղոլիայի նախագահ Խալթմաագիյն Բաթուլգան հայտարարել է, որ պատրաստ է հացադուլ հայտարարել կամ նստացույց անել, եթե երկրի խորհրդարանը՝ Մեծ ազգային խուրալը հրաժարվի ինքնակամ արձակվելուց, հայտնում է «ՌԲԿ»–ն՝ վկայակոչելով Bloomberg–ն։

Հարցին, թե ինչ կանի նա այն բանից հետո, երբ խնդրի խորհրդարանին ցրվել, նախագահը պատասխանել է. «Հացադո՞ւլ». «Սա այն հարթակն է, որին մենք այժմ գտնվում ենք։ Ես տարատեսակ տարբերակներ եմ փորձել, առաջարկ եմ ուղարկել, մենք քննարկել ենք այդ հարցը»,–հավելել է երկրի ղեկավարը։

Նախօրեին՝ հոկտեմբերի 29-ին երկրի նախագահը խորհրդարանի խոսնակ Միեգոմբին Էնխբոլդին նամակ է փոխանցել, որում առաջարկել է քննարկել Մեծ ազգային խուրալի արտահերթ արձակումը։ Նամակում նշվում է, որ խորհրդարանը չի կարողացել կատարել խոստումները, որոնք նա տվել է 2016–ի ընտրությունների ժամանակ, ինչպես նաեւ տեղական օրենքների խախտում է թույլ տվել։