«Հեղափոխության անվան տակ սրիկաներ կարող են դիրքավորվել». ի՞նչ է կատարվում Ուրցաձորում

Ինչպես բոլոր հեղափոխությունների ընթացքում է եղել, այնպես էլ Թավշյայի պարագայում ականատես ենք լինում, թե ինչպես են որոշ մարդիկ փորձում «կրակից ուրիշի ձեռքերով շագանակներ հանել» ու ի շահ իրենց օգտագործել ժողովրդի արդար պայքարի արդյունքները:

ՀՀ գործադիր մարմնի նիստին զուգահեռ հոկտեմբերի 25-ին Կառավարության շենքի մոտ համախմբվել և վարչապետի պաշտոնակատարի հետ հանդիպման ակնկալիքով բողոքի ակցիա էին իրականացնում Արարատի մարզի Ուրցաձոր համայնքի բնակիչները:

Նրանց բողոքը պայմանավորված էր վերջերս համայնքապետի ժամանակավոր պաշտոնակատար Գևորգ Ավետիսյանի նշանակման փաստով, ավելի ճիշտ՝ նրա անձով:
«Ում ուզում են, թող նշանակեն, միայն թե ոչ Գևորգին։ Նա 25 տարեկան է։ Ի՞նչ կարող է անել գյուղի համար», — լրագրողի հետ զրույցում ասել էր Ուրցաձոր համայնքի բնակիչ Ռուզաննա Սարգսյանը։

Ըստ Ռուզաննա Սարգսյանի՝ նախորդ գյուղապետը, որի աշխատանքից հավաքվածները դժգոհություն չեն ունեցել, հրաժարական է տվել «30 մարդու» բարձրացրած բողոքի հետևանքով:

Հիշեցնենք, որ Ուրցաձոր խոշորացված համայնքի նախկին ղեկավար Ռաֆիկ Անդրեասյանի դեմ մի խումբ մարդիկ մի քանի օր շարունակ բողոքի ակցիաներ էին իրականացնում՝ նշելով, որ թեև նա անկուսակցական է, բայց ՀՀԿ-ի կողմնակից է ու, իբրև թե, չարաշահումներ է արել:

Իսկ ինչի՞ց էր սկսել ամենը. հոկտեմբերի 1-ին՝ մինչև հրաժարական տալը, որն ի դեպ նախկին համայնքապետը համաձայնեց անել, միայն հանուն այն բանի, որ գյուղում անախորժություններ ու պառակտում չլինի, Ռաֆիկ Անդրեասյանը մամուլի ասուլիս էր հրավիրել ու ներկայացրել, թե ինչն է խնդիրը:

«Մենք ունենք մի համագյուղացի՝ Մանուկ Մանուկյանը, որը հիմնական դերակատարն է, որն այսօր է ձայն բարձրացրել, թե համայնքի ղեկավարը այսպես-այսպես չարաշահումներ է արել: Պատճառը որն է. նախկինում Մանուկ Մանուկյանը աշխատել է Վայրի բնության և մշակութային արժեքների պահպանության հիմնադրամում (FPWC) և երևի տնօրենի հետ ինչ-որ ներքին-աշխատանքային խնդիրներ ունեին: Այդ ընթացքում նա եկել էր ինձ մոտ, ես էլ նրան ուղղորդեցի որ գնա և տնօրենի հետ իր խնդիրները լուծի՝ հավելելով, որ ես պատրաստ եմ ամեն ինչով օգնել իրենց (խմբ. այսինքն՝ Հիմնադրամի) աշխատանքներին, քանի որ իրենց գործունեությունից, որը ծավալում են Արարատի մարզի Ուրցաձոր համայնքում, որպես համայնքապետ ես գոհ եմ»,- լրագրողներին պատմել էր Անդրեասյանը (https://youtu.be/7Bbwk-IpgPY?t=3953) 

Անդրեասյանը նաև ներկայացրել էր, որ Մանուկ Մանուկյանի հետ 15 տարի ունեցել է մտերիմ հարաբերություններ, որոնք փչացել են, երբ Մանուկյանը շանտաժի ձևով վերջնագիր է ներկայացրել իրեն, թե «դու ի՞մ կողքն ես կանգնում, թե՞ Խաչատրյան Ռուբենի» (խմբ.՝ FPWC-ի հիմնադիր):

«Ես նրան բացատրեցի, որ ես երկուսիդ էլ հարգում եմ, բայց գործ ունեմ իրավաբանական անձի հետ. երբ դու կներկայանաս որպես իրավաբանական անձ, ես գործ կունենամ քո հետ: Ես մեկ մարդու համայնքի ղեկավար չեմ, ես պարտավորություն ունեմ իմ համայնքի նկատմամբ, ես խոստումներ եմ տվել ընտրվելիս և իմ խոստումները համայնքի առաջ կատարվել են: Եվ այդ ամենը կատարվել է մեր համագյուղացիների շնորհիվ, մեր համերաշխության շնորհիվ: Սրա արդյունքում մենք բուռն զարգացման տեմպի ենք հասցրել համայնքը: Եվ այդ ամենի հետևում միշտ դրել եմ ոչ թե իմ հեղինակությունը բարձր պահելու խնդիրը, այլ Ուրցաձորի հեղինակության խնդիրը: Իսկ Ուրցաձորի մասին խոսում են ոչ միայն Արարատի մարզում, կամ առհասարակ Հայաստանում, այլ՝ Ճապոնիայից միչև Բրիտանիա»,- մանրամասնել է Ռաֆիկ Անդրեասյանը:

Ըստ համայնքապետի՝ դրանից հետո են սկսել խոսակցությունները, թե համայնքապետը չարաշահումներ է արել: «Արդյո՞ք այդ մարդը այդ 15 տարիների ընթացքում չէր տեսել այդ չարաշահումները»,- հարց է տալիս Անդրեասյանը:

Հետագայում Ուրցաձորում իրադարձությունները ծավալվում են արդեն հայտնի սցենարով. բողոքի ակցիաներ են սկսում, տարբեր, ընդ որում նաև վիրավորական ու զրպարտիչ գրառումներ սոցիալական ցանցերում, բանակցություններ մարզպետի և մարզպետարանի այլ բարձրաստիճան պաշտոնյաների հետ:

Ի վերջո համայնք է գալիս ՀՀ Պետական վերահսկողական ծառայության պետ Դավիթ Սանասարյանը, որի ներկայությամբ Ռաֆիկ Անդրեասյանը հայտարարում է, որ հրաժարական կներկայացնի համայնքի ավագանուն՝ հետագայում ընտրություններին մասնակցելու պատրաստակամությամբ և հաղթելու համոզվածությամբ (https://youtu.be/_btrEsjlwf4?t=359 )

Անդրեասյանի հրաժարականը համայնքի ավագանին ընդունեց ու կյանքն այստեղ վերադարձավ իր նախկին ու խաղաղ հունին: Իր այս քայլը նախկին համայնքապետը մեկնաբանեց այն հանգամանքով, որ չէր ուզում գյուղում երկպառակություն լինի:

Բայց գյուղում երկպառակություն, ցավոք, եղավ ու եղավ նաև ընդհարում (live` https://www.facebook.com/koryun.xachatryan.1/videos/2171824449806798/ )

Պատճառը դարձավ Արարատի մարզպետի որոշումը, ըստ որի ընթերցողին արդեն ծանոթ Մանուկ Մանուկյանի զարմիկը նշանակվեց համայնքապետի ժամանակավոր պաշտոնակատար: 

Ընդ որում, 28-ամյա այս երիտասարդը չունի կառավարչի հմտություն ու չի կարող գոնե ժամանակավոր կատարել իր ստանձնած պարտականությունները:

Հանրային հեռուստաընկերության «Լուրերի» թղթակցի հարցին, թե ունի արդյո՞ք նա կառավարման փորձ, Ավետիսյանը պատասխանել էր, որ Երևանի կենդանաբանական այգում զբաղվել է «սրճարան, մանկական զվարճանքներ… նման բաների կազմակերպչական աշխատանքներով» (Հ1 «Լուրերի» 25.10.2018 հիմնական թողարկում՝ https://youtu.be/Zp1UtWNTVrg?t=826):

Թե ինչո՞ւ է Արարատի մարզպետ Գարիկ Սարգսյանը որոշել այս մարդուն վստահել մոտ 4000 բնակիչ ունեցող Ուրցաձոր համայնքի կառավարումը հարց է, որը թերևս որոշ ժամանակ անց պարզ կդառնա:

«Հրահրում են՝ պղտոր ջրում ձուկ բռնելու համար… Շատ զգույշ պետք է լինել. սրիկան, ճարպիկը, դատարկը հասկանում են, որ պետք է շատ արագ գտնել ձև ՔՊ անդամ դառնալու, որովհետև նրանց թվում է, որ իրենց շանսերը դրանով մեծանում են՝ Նիկոլը եկավ ու նրա ուժը փոխանցվեց իրենց: Բայց Նիկոլի ուժն անձնավորված է, չի կարելի շահագործել այն»,- «Առաջին լրատվականի» հետ զրույցում ասել է «Մխիթար Սեբաստացի» կրթահամալիրի տնօրեն Աշոտ Բլեյանը:

Ուրցաձորի համայնքապետի ժամանակավոր պաշտոնակատարի նշանակման դեմ կառավարության մոտ երեկ տեղի ունեցած բողոքի ակցիայի մասնակիցների շարքում էր նաև Աշոտ Բլեյանը: «Իրական, պարկեշտ, մտահոգ մարդկանց, ովքեր մասնակից են եղել և վստահել են հեղափոխությանը, սխալվելու իրավունք են տվել, բայց հանկարծ տեսել են, որ իրենց խաբում են, և նորից հայտնվել են իրադարձությունների կենտրոնում: Եթե սխալվել են, խաբել են նրանց, ուրեմն պետք է ուղղեն սխալը»,- համոզված է պրն Բլեյանը:

Աննա Բաղդասարյան

Top-News.am

https://www.youtube.com/watch?v=7Bbwk-IpgPY