Խանութի տերը ծուղակն է գցել իրեն թալանել փորձող գողերին և ձերբակալել տվել նրանց

Բելգիայի Շարլերոյ քաղաքում վեց մարդուց բաղկացած հանցախումբը փորձել է թալանել էլեկտրոնային ծխախոտ վաճառող խանութն ու փորձանքի մեջ է ընկել:

Ինչպես հայտնում է Oddity central-ը, զինված տղամարդիկ, խանութ մտնելով, գանձապահից պահանջել են իրենց տալ դրամարկղի գումարը: Գանձապահը, որը նաև խանութի տերն է, բավականին հնարամիտ է գտնվել և փորձել է վանել գողերին: Նա ասել է, որ դեռ առևտուր չի կատարել և շատ գումար չունի իրենց տալու: Ավելին, նա գողերին խորհուրդ է տվել վերադառնալ օրվա վերջին, երբ դրամարկղում 2000-3000 եվրո հավաքված կլինի:

Որքան էլ զարմանալի թվա, գողերը լսել են խանութպանին և շարժվել նրա խորհրդով: Խանութից հեռանալով 15:00-ին՝ նրանք վերադարձել են 17:30-ին:

Ոստիկանները, չհավատալով, որ գողերը կարող են իրոք վերադառնալ, չէին ժամանել խանութ: Խանութպանն ստիպված նույն հնարքին է դիմել և խնդրել է գողերին մեկ ժամից գալ:

Մեկ ժամ անց նրանց արդեն դիմավորել են ոստիկանները: Նրանց հաջողվել է ձերբակալել հինգին, մինչդեռ վեցերորդը փախել է: