Բավարիայի ընտրություններում Մերկելի «Քրիստոնեա-սոցիալական միություն»-ը կորցրել է խորհրդարանի մեծամասնությունը

Կիրակի՝ հոկտեմբերի 14-ին, Գերմանիայի Բավարիա դաշնային նահանգի խորհրդարանական ընտրությունների արդյունքում «Քրիստոնեա-սոցիալական միության»-ը չի հաջողվել բացարձակ մեծամասնություն կազմել խորհրդարանում: Միությունը հավաքել է ձայների 35.5%-ը:

«Քրիստոնեա-սոցիալական միություն»-ը, որը երկրի կանցլեր Անգելա Մարկելի «Քրիստոնեա-դեմոկրատական միության» քույր կուսակցությունն է, Բավարիայի նահանգում գերիշխող դիրք էր գրավում Երկրորդ աշխարհամարտի ավարտից ի վեր: Մասնագետներն այս արդյունքները կանցլերի դաշնակիցների համար լուրջ ձախողում են համարում:

Երկրորդ տեղում է հայտնվել Կանաչների կուսակցությունը՝ հավաքելով քվեների 17.5%-ը:

Հակամիգրացիոն «Այլընտրանք Գերմանիայի համար» կուսակցությունը ձայների 10.2%-ով հայտնվել է երրորդ տեղում՝ այսպիսով առաջին անգամ տեղեր վաստակելով Բավարիայի խորհրդարանում:

Ընտրություններին մասնակցությունը զգալիորեն մեծ է եղել, քան Բավարիայում անցկացված նախորդ՝ 2013թ. ընտրությունների ժամանակ: Քվեարկությանը մասնակցել է 9.5 մլն ընտրողների 72.4%-ը: