Մարի Անտուանետի շքեղ զարդերը կհանվեն աճուրդի (լուսանկարներ)

Ֆրանսիայի պատմության ամենահայտնի թագուհիներից մեկին, Լյուդովիկոս XVI-ի կնոջը՝ Մարի Անտուանետին, պատկանած շքեղ զարդերը, որոնք ավելի քան 200 տարի պահվել են մասնավոր հավաքածուներում, հաջորդ ամիս կհանվեն աճուրդի:

Ինչպես նշում է Al Arabiya-ն, նախքան բրիտանական Sotheby’s-ի կողմից Ժնևում կայանալիք աճուրդը, զարդերը ցուցադրության են հանվել Դուբայում:

Հեղինակավոր աճուրդի տնից նշել են, որ դրանք կլինեն երբևէ աճուրդով վաճառված ամենակարևոր թագավորական նմուշները, որոնց շարքում են 49 կարատանոց բնական մարգարիտը, ադամանդապատ մանյակներ, կրծքազարդեր, ականջօղեր՝ մի քանի միլիոն դոլար ընդհանուր արժեքով:

Մարի Անտուանետն ու ամուսինը Ֆրանսիական հեղափոխությունից հետո 1793թ. գլխատվել են գիլյոտինի միջոցով: Դրանից հետո նրա զարդերը Ֆրանսիայից Վիեննա են տեղափոխվել: