Ավստրիան մտադիր է ապաստան հայցողներին արգելել զենք ունենալ

Ավստրիայի կառավարությունը մտադիր է ապաստան հայցողներին արգելել «զենքի եւ զինամթերքի ձեռքբերումը, ունենալը եւ կրելը», հայտնում են ավստրիական Der Standard եւ Kurier պարբերականները:

Պարբերականների տեղեկություններով՝ առաջարկվող արգելքը կտարածվի ոչ միայն ապաստան տրամադրելու միջնորդություն ներկայացրածների վրա, այլեւ այն անձանց, ովքեր ապաստան ստանալու իրավունք ունեն:

Համապաստասխան օրինագիծը կներկայացվի հոկտեմբերի 8-ին: Հրազենի վերաբերյալ նախկինում գոյություն ունեցող արգելքի գործողությունը կտարածվի ծակող եւ կտրող զենքերի վրա: Ավստրիայի ՆԳ նախարար Հերբերթ Կիկլը նման միջոցը պարզաբանել է «կյանքի դեմ հանցագործությունների մեծ աճով, որոնք իրականացվում են սառը զենքի միջոցով»:

Քրեական վիճակագրության համաձայն՝ Ավստրիայում 2017 թվականին գրանցվել է ծակող-կտրող զենքի կիրառմամբ հանցագործության 1060 դեպք: 2008 թվականին գրանցվել էր նման ընդամենը 272 միջադեպ: Ըստ որում՝ այդ հանցագործությունների մեջ 635 կասկածյալները ծագումով այլ երկրներից են: