Ինտերպոլի անհետացած նախագահը չինացիների ձեռքում է հայտնվել

Ինտերպոլի անհետացած նախագահ Մեն Հունվեյը գտնվում է Չինաստանում քննության տակ, հայտնում է South China Morning Post-ը:

Հրապարակման մեջ նշվում է, որ «անցյալ շաբաթ Չինաստանում վայրէջք կատարելուն պես տղամարդուն տարել են կարգապահական իշխանությունները հարցաքննելու համար»: Աղբյուրը չի հստակեցրել, թե Ինտերպոլի նախագահը ինչ կոնկրետ գործով է անցնում: Չի հաղորդվում նաեւ, թե հիմա նրան որտեղ են պահում:

Ավելի վաղ Ինտերպոլը մեկնաբանելով Մեն Հունվեյի անհետացումը՝ հայտարարել էր, որ դա Ֆրանսիայի եւ Չինաստանի համապատասխան կառույցների պարզաբանման հարցն է: Կազմակերպությունից նաեւ հայտնել էին, որ իր ամենօրյա աշխատանքը վերահսկում է ոչ թե նախագահը, այլ գլխավոր քարտուղարը, եւ հրաժարվել էին այլ մեկնաբանություններից:

Տղամարդու անհետացման մասին հայտնի է դարձել հոկտեմբերի 5-ին: Հաղորդվում էր, որ 64-ամյա Մեն Հունվեյը սեպտեմբերի 29-ին Ֆրանսիայից ուղեւորվել էր Չինաստան: Այդ օրից մինչեւ հիմա ոչ ոք նրանից ոչ մի տեղեկություն չի ստացել: Լիոնում երեխաների հետ բնակվող նրա կինը դիմել է իշխանություններին. այնտեղ է գտնվում Ինտերպոլի կենտրոնակայանը:

Մեն Հունվեյը կազմակերպության նախագահն է դարձել 2016 թվականի աշնանը: Նա այս պաշտոնը պետք է զբաղեցնի մինչեւ 2020 թվականը: Մինչ այդ նա աշխատել է Չինաստանի հասարակական անվտանգության փոխնախարարի պաշտոնում, ինչպես նաեւ ղեկավարել է Չինաստանի Ինտերպոլի Կենտրոնական ազգային բյուրոն:

Այս թեմայով Անհետացել է Ինտերպոլի ղեկավարը․ Ֆրանսիայի ոստիկանությունը գործ է հարուցել Արցախում պեղումներ իրականացնող գիտաշխատողների նկատմամբ հետախուզում չի կարող իրականացվել. «Ինտերպոլ»