Ռուսաստանը S-400 հրթիռներ է վաճառելու Հնդկաստանին

Կրեմլը հայտնել է, որ Ռուսաստանը և Հնդկաստանը մտադիր են կնքել 5 միլիարդ դոլարի արժողությամբ պայմանագիր, որով Ռուսաստանը S-400 (C-400) «երկիր-երկինք» տեսակի հակաօդային պաշտպանության հրթիռային համակարգեր կտրամադրի Հնդկաստանին:

Ենթադրվում է, որ պայմանագիրը կստորագրվի վարչապետ Նարենդրա Մոդիի հրավերով նախագահ Վլադիմիր Պուտինի հոկտեմբերի 4-5-ը Հնդկաստան կատարելիք այցի ընթացքում:

Կողմերը կնքելու են պայմանագիրը` չնայած Միացյալ Նահանգները Հնդկաստանին կոչ է արել խուսափել այդ գործարքից:

«Այցի օրակարգում գլխավոր իրադարձությունը հակաօդային պաշտպանության հրթիռների վաճառքն է», - ասել է նախագահ Պուտինի միջազգային քաղաքականության հարցերով ավագ խորհրդական Յուրի Ուշակովը, հավելելով, որ Ռուսաստանի և Հնդկաստանի ռազմական համագործակցությունն «ավանդական է և երկար տարիների պատմություն ունի»:

Ըստ վերլուծաբանների, տարածաշրջանում Չինաստանի հետզհետե հզորացող ազդեցությանը հակազդելու համար Հնդկաստանի հետ համագործակցությունը սերտացնելու նպատակ հետապնդող Միացյալ Նահանգները Նյու Դելիին հորդորում է խուսափել ռուսների հետ խոշոր գործարքներից, քանի որ այն կարող է հանգեցնել ռազմական տեխնոլոգիաների հարցում Հնդկաստանի կախվածությանը Մոսկվայից:

Վաշինգտոնը նախազգուշացրել է, որ գործարքը կհակասի Ռուսաստանի նկատմամբ ԱՄՆ-ի սահմանած պատժամիջոցներին, որոնք այս տարի արդեն ուժի մեջ են մտել:

Հնդկաստանը հաղորդել է, որ ԱՄՆ-ին կդիմի S-400 հրթիռների գործարքի հարցում բացառություն անելու խնդրանքով: