Իսրայելը գաղտնի միջուկային զենք է արտադրում

Իրանի արտաքին քաղաքական գերատեսչության ղեկավար Մոհամադ Ջավադ Զարիֆը կոչ է արել Թել Ավիվին պատմել «միջուկային սպառազինման ապօրինի ծրագրի» մասին:

Ինչպես նշում է ria.ru-ն, Զարիֆի կոչին նախորդել էր Իսրայելի վարչապետ Բինյամին Նեթանյահուի հայտարարությունն առ այն, որ Իսրայելը «գաղտնի ատոմային պահեստ» է հայտնաբերել Թեհրանում:

«Արվեստների ու արհեստների շոուն չի կարող քողարկել այն փաստը, որ Իսրայելը մեր տարածաշրջանի՝ իրական միջուկային զինանոց ներառող միջուկային սպառազինման գաղտնի ու չհայտարարագրված ծրագիր ունեցող ռեժիմն է: Ժամանակն է, որ Իսրայելը խոստովանի ու միջազգային փորձագետների առաջ բացի միջուկային սպառազինման իր ապօրինի ծրագիրը»,- թվիթերյան միկրոբլոգում գրել է պաշտոնյան:

Աղբյուրը հիշեցնում է, որ նախօրեին ՄԱԿ-ի Գլխավոր վեհաժողովում ելույթ ունենալու ժամանակ Իսրայելի վարչապետը հայտարարել էր հրեական հետախուզական ծառայության արած բացահայտումների մասին:

Համաձայն դրանց՝ Իրանի մայրաքաղաքում կա գաղտնի պահեստ, որտեղ պահվում են տոննաներով միջուկային սարքավորումներ, նյութեր: Որպես իր ասածի ապացույց՝ Նեթանյահուն ցուցադրել էր արբանյակից արված լուսանկարը:

Հայտնի է, որ երկու պետությունների հարաբերությունները լարված են 1979թ. ի վեր, երբ Իրանում տապալվել է միապետական կարգը: Երկրների միջև տարաձայնությունները կրում են կրոնական, քաղաքական ու տնտեսական բնույթ: Թեհրանը դժգոհ է այն փաստից, որ իսրայելական կողմը շրջափակել է մուսուլմանների տարածքները, մինչդեռ Թել Ավիվին անհանգստացնում է Իրանի միջուկային ծրագիրը: Երկրները բազմիցս հայտարարել են ռազմական գործողությունների պատրաստ լինելու մասին: