Վիկտոր Ցոյի անձնագիրն աճուրդում վաճառվել է 9 մլն ռուբլով

Վիկտոր Ցոյի անձնագիրը չորեքշաբթի աճուրդում վաճառվել է 9 միլիոն ռուբլով։ Գործարքն իրականացրել է «Լիտֆոնդ» աճուրդային տունը։ Լոտի արժեքը մեկնարկային գնից (2,5 մլն ռուբլի) երեք անգամ աճել է։ Երգչի ծոցատետրը վաճառվել է 3 մլն ռուբլով, իսկ «Փոփոխություններ եմ ուզում» երգի ձեռագիրը՝ 3,6 մլն ռուբլով՝ տեղեկացնում է ՏԱՍՍ-ը։

Անձնագիրը Ցոյին տրվել է 16 տարեկանում՝ ութ ամիս ուշացումով։ Նրանում տեղեկություն կա Լենինգրադի Մոսկովյան շրջանի ԶԱԳՍ-ում Մարիանա Ռոդովանսկայայի հետ ամուսնության գրանցման մասին։

Ըստ «Լիտֆոնդի» գլխավոր տնօրեն Սերգեյ Բուրմիստրովի՝ աճուրդի տան մասնագետները հարցում են կատարել ՆԳՆ, այնուհետեւ փորձաքննություն են իրականացրել եւ հաստատել են, որ փաստաթուղթը բնօրինակն է։

Ցոյի ծոցատետրում գրանցված են մոսկովյան եւ լենինգրադյան ռոք-երաժիշտների, այդ թվում՝ Բորիս Գրեբենշչիկովի, Մայք Նաումենկոյի, Արտեմի Տրոիցկիի հեռախոսահամարները։