Սիրիան և ինքնահռչակ Հարավային Օսիան պայմանագիր են կնքել

Սիրիայի նախագահ Բաշար ալ-Ասադը երեկ Դամասկոսում ընդունել է Հարավային Օսիայի ինքնահռչակ հանրապետության ղեկավար Անատոլի Բիբիլովին:

Սիրիան երկու ամսիս առաջ համալրել է Վրաստանից անջատված Հարավային Օսիայի և Աբխազիայի անկախությունը ճանաչած մի քանի երկրների ցանկը:

Ասադի գրասենյակը հայտնել է, որ Հարավային Օսիայի փաստացի ղեկավարը եռօրյա աշխատանքային այցով է գտնվում Սիրիայում:

Ասադը Բիբիլովին շնորհակալություն է հայտնել սունի ապստամբների դեմ 7 տարի տևող պատերազմում «Սիրիայի օրինական իշխանությանը, ինքնիշխանությանը և միասնականությանը սատարելու համար»:

Ասադը պնդել է, որ «ի տարբերություն արևմտյան երկրների մեծ մասի՝ Հարավային Օսիան ճանաչում է միջազգային իրավունքի հիմնարար սկզբունքները»:

Ռուսական աղբյուրների փոխանցմամբ, Սիրիան և Հարավային Օսիան երեկ Դամասկոսում բարեկամության և համագործակցության պայմանագիր են կնքել:

Ռուսաստանից զատ Հարավային Օսիայի և Աբխազիայի անկախությունը ճանաչել են Վենեսուելան, Նիկարագուան, Նաուրուն և Սիրիան:

Վրաստանը խզել է դիվանագիտական հարաբերությունները Սիրիայի հետ այն բանից հետո, երբ Դամասկոսը պաշտոնապես ճանաչել է այդ երկու անջատական տարածքների անկախությունը:

Այս թեմայով Հալեպի նահանգային իշխանություններն այցել են ՀՀ գլխավոր հյուպատոսություն ԱՄՆ-ն դատապարտում է Սիրիայում արմատական ​​ահաբեկիչների իրականացրած սպանությունները. Մարկո Ռուբիո Հարյուրավոր սիրիացիներ բռնությունից ապաստան են գտել Լաթաքիայի ռուսական ավիաբազայում. Reuters Պուտինը, Մերկելը, Էրդողանը և Մակրոնը Սիրիայի հարցով քառակողմ հանդիպում կունենան Սիրիական բանակը մասամբ ազատագրել է Իդլիբը