Իսկ ուր մնացին խոստումները եւ նորոգված փողոցները

Ոչ այնքան հեռավոր, բայց արդեն պատմության գրկում հայտնված 2015 թվականին, երբ սահմանադրական հանրաքվեի անցկացմանը մնացել էր մի քանի օր, Սերժ Սարգսյանն իր մոտ հրավիրեց Գյումրու քաղաքապետ Սամվել Բալասանյանին եւ հայտարարեց՝ անհապաղ սկսել զբաղվել Գյումրու երկրորդական փողոցների ասֆալտապատման եւ լուսավորման խնդիրների կարգավորմամբ:

Սարգսյանին այնքան էր հուզում խնդիրը, որ հրամայեց. «Համա-համա, շատ չուշանա»(Հովհ. Թումանյան «Շունն ու կատուն»): Աշխատանքների իրականացման գումարի մասին էլ վստահեցրեց. «Վարձիդ մասին միամիտ մնա…»,- նախատեսվում էր վերակառուցման եւ զարգացման եվրոպական բանկից 23,8 մլն եվրո վարկադրամաշնորհային գումար խնդրել՝ փողոցները ասֆալտապատել, լուսավորել եւ վերադարձնել գյումրեցուն:

2015 թվականի երկուշաբթին եկավ բոլորի, բայց ոչ Սերժ Սարգսյանի համար: Ոչ մի աշխատանքի սկսման մեկնարկ չտրվեց: 2015 թվականից առ այսօր միայն մի քանի հուշագրեր են ստորագրվել, բայց աշխատանքները չեն սկսվում: Իշխանությունները 2015-ին խոստացած բարեկարգումը տեղափոխեցին 2016 թվական, հետո 2017: Արդեն, 2017-ին վերակառուցման եւ զարգացման եվրապական բանկից տեղեկացնում են, որ եթե եղանակները բարենպաստ լինեն, ապա աշխատանքները կմեկնարկեն 2018 թվականի գարնանը:

«Ծրագիրն արդեն իսկ մեկնարկել է, ինչ վերաբերում է շինարարական աշխատանքներին, ապա դրանք կարող են մեկնարկել խորհրդատվական ընկերության ընտրությունից հետո՝ համապատասխան նախագծանախահաշվային փաստաթղթերի եւ մրցութային փաստաթղթերի մշակումից, ինչպես նաեւ դրանց հիման վրա շինարարական կազմակերպության մրցութային գործընթացների կազմակերպումից հետո: Ըստ ժամանակացույցի նախատեսվում է, որ բոլոր այդ գործընթացներն ավարտին կարող են հասցվել մինչեւ սույն տարվա վերջ, եւ համապատասխան ընկերության կամ ընկերությունների հետ կարող են պայմանագրեր կնքվել 2017 թվականի դեկտեմբերին, իսկ աշխատանքները կարող են մեկնարկել արդեն 2018 թվականի գարնանը՝ եղանակների թույլ տալուն պես»,- փոխանցում են բանկի մամուլի ծառայությունից:

«Փողի մասին ավելորդ ա, Մեր մեջ խոսելն էլ ամոթ ա, Ի՜նչ մեծ բան ա, տո՜, հե՛ր օրհնած…»,- Սերժ Սարգսյանը հավանաբար միայն այս պատասխանը ունի գյումրեցիներին:

Նշենք, որ ծրագիրը բաղկացած է դրամաշնորհային և վարկային բաղադրիչներից, որից 14,6 մլն եվրոն կազմում են վարկային, իսկ 7,3 մլն եվրոն դրամաշնորհային միջոցներ, ինչպես նաև 1,7 մլն եվրո դրամաշնորհային միջոցներ են նախատեսվել խորհրդատվական ծառայությունների գնման համար: Այս ծրագրով նախատեսվում է ասֆալտապատել եւ լուսավորել Գյումրու 15-20 կմ երկարությամբ փողոց:
Միանշանակ պարզ է, որ 23 միլիոն եվրո գումարը լավ խաղաթուղթ է Սերժ Սարգսյանի ձեռքին: Մնում է սպասել, թե քանի գյումրեցի է միայն այս խայտառակությունից հետո քվեարկելու ՀՀԿ-ի օգտին:

Ի դեպ, եթե այս պատմությունը շարունակվի նույն տրամաբանությամբ, ապա կստացվի մոտավորապես այս պատկերը.

Էն օրվանից մինչև օրս էլ
Գյումրեցին էս բանը չի մոռացել,
Մըտքում հըլա դեռ պահում ա,
Որտեղ Սերժին պատահում ա,
Վեր ա թըռչում, վըրա վազում,
Իր փողոցը ետ ա ուզում.
Իսկ Սերժ Սարգսյանը հանկարծ
Ետ ա դառնում ու բարկացած
հայտարարում. մըթամ նոր եմ
Ցըրցամ տըվել, թե որ սարքեմ:

Դավիթ Գասպարյան

Այս թեմայով Վարդան Ղուկասյանը երկու ամսով կալանավորվեց Գյումրիի քաղաքապետարանը քաղաքացիներին հորդորում է չտրվել սադրանքների Կարմիր ու սեւ բերետավորները բիրտ ուժի կիրառմամբ բերման են ենթարկում քաղաքացիներին. լսվում են հայհոյանքներ (տեսանյութ) Գյումորւ քաղաքապետ Վարդան Ղուկասյանին տեղափոխում են Երևան՝ Հակակոռուպցիոն կոմիտե Ինչպես են կարմիր բերետավորները մուտք գործում Գյումրիի քաղաքապետարանի շենք (տեսանյութ)