ԱՄՆ-ում կորել է զինագործական պլուտոնիում

ԱՄՆ-ի Այդահոյի պետական համալսարանի աշխատակիցները կորցրել են զինագործական պլուտոնիումի կտոր, որը գտնվում էր նրանց պահպանության ներքո, հայտնում է Live Science-ը։

Վերջին անգամ ռադիոակտիվ նյութերի հաշվառումը համալսարանում անցկացվել է 2004 թվականին։ Այն ժամանակ պլուտոնիում-239-ի 14 մեկգրամանոց կտորները փաթեթավորել են հետագա թաղման համար։ Դրանից հետո պլուտոնիումի մասին գրառումը ջնջել են տվյալների բազայից, որը համալսարանը պետք է վարեր Միջուկային կարգավորման հանձնաժողովի համար։ Ուր է կորել կտորը, անհայտ է։

Հանձնաժողովի մամուլի քարտուղար Վիկտոր Դրիկսը խոստովանել է, որ չի կարող հաստատ ասել, որ կորցված պլուտոնիումը վտանգ չի ներկայացնում, սակայն ենթադրել է, որ կորուստի պատճառը կարող է գրառման սխալը լինել։

Հանձնաժողովը առաջարկում է տուգանք սահմանել համասարանի համար 8500 դոլարի չափով, քանի որ աշխատակիցները անփութություն են դրսեւորել։ Պետք է նշել, որ պլուտոնիում-239-ի մեկ գրամը բավարար չէ միջուկային ռումբ ստեղծելու համար, սակայն այն բավարար է ոչ մաքուր ռումբի ռադիոակտիվ հիմքի համար։