Արոնյանի տարօրինակ պարտությունների գաղտնիքը

Հայ շախմատասերները հավակնորդների եզրափակիչ մրցաշարից առաջ լուրջ հույսեր ունեին, որ մեր լավագույն շախմատիստ Լեւոն Արոնյանը կպայքարի առաջին տեղի համար եւ ամիսներ հետո աշխարհի չեմպիոնի կոչումը կվիճարկի նորվեգ Մագնուս Կառլսենի հետ:

Նման հույսերը լուրջ հիմքեր ունեին: Արոնյանը լավ մարզավիճակում էր եւ աստիճանաբար վեր էր բարձրանում դասակարգման աղյուսակում: Ցավոք, դեռ մրցաշարի ավարտից առաջ կարող ենք ձաստել, որ Արոնյանը մեր եւ իր հույսերն այս անգամ եւս չի իրականացնի: Միջնամասում Արոնյանը մի քանի անակնկալ եւ տարօրինակ պարտություններ կրեց:

Իհարկե, որեւէ մեկը երաշխավորված չէ պարտություններից, բայց շախմատիստները կվկայեն, որ նման մակարդակի շախմատիստները մեկը մյուսի հետեւից այսպես չեն պարտվում:

Երրորդ տուրում շատ արագ պարտվելով Կրամնիկին, Արոնյանը հաջորդ տուրում հաղթեց Կարյակինին եւ շատերը մտածեցին, որ պարտությունը էապես չի ազդի հետագա պայքարի վրա, բայց այն ինչ տեղի ունեցավ հետո սարսափ ֆիլմի սցենար է հիշեցնում:

Լեւոն Արոնյանը վեցերորդ տուրում զիջեց Սո Վեսլիին, իսկ հաջորդ խաղում պարտվեց Ֆաբիանո Կարուանային, այն էլ այնպես, կարծես իր նպատակն անպայման հենց պարտվելն էր: 

Ութերորդ եւ իններորդ տուրերում խաղալով ոչ-ոքի, ընդ որում, ջանքեր չգործադրելով հաղթանակի համար, Արոնյանը տասներորդ տուրում պարտվեց Կրամնիկին, որն այս մրցաշարում, մեղմ ասած, լավ հանդես չի գալիս եւ հաղթում է միայն Արոնյանին:

Այս պարտությունից հետո Լեւոնը նույնպես, կարծես ցուցադրաբար, եւ ինչ որ բան հասկացնելու համար վերցրեց եւ պարտվեց Կարյակինին:

Մրցաշարի ավարտին մնացել է երկու տուր: Արոնյանին մնում է խաղալ Կարուանայի եւ Սո Վեսլիի հետ: Իսկ մրցաշարային աղյուսակն այնպիսի տեսք ունի, որ առաջին տեղի համար կարող են պայքարել, իսկ ավելի ճիշտ, չեն կարող պայքարել միայն Կրամնիկը, Սո Վեսլին եւ մեր Լեւոնը:

Կարյակինն ու Կարուանան ունեն յոթական, իսկ Դինգ Լիրենը, Գրիշչուկը եւ Մամեդյարովը վաստակել են վեց եւ կես միավոր:

Մինչեւ 12-րդ տուրը բավական լավ վիճակում էր Շաքրիյար Մամեդյարովը, բայց զիջելով Դինգ Լիրենին նա բարդացրեց իր գործերը եւ լավ նվեր մատուցեց Գրիշչուկին եւ Կարուանային: Հենց վերջինիս եւ Արոնյանի խաղից մեծապես կախված կլինի Մամեդյարովի ճակատագիրն այս մրցաշարում: Լեւոնն իր խաղով կարծես հենց սկզբից մեզ հասկացրեց, որ այս մրցաշարում ինչ որ բան այնպես չէ, եւ որ իր պայքարն անիմաստ է: 

Հենց սկզբից էլ ակնհայտ էր, որ ունենք հաղթողի երեք հիմնական հավակնորդ, որոնց վրա, ինչպես ասում են, հսկայական խաղադրույքներ են արված:

Կարուանային վաղուց են նախապատրաստում աշխարհի չեմպիոնությանը եւ նրա վրա հսկայական գումարներ են ծախսվել եւ ծախսվում: Ռուսաստանը խաղադրույք է արել Կարյակինի վրա, իսկ Ադրբեջանում կայանալիք նախագահական ընտրություններից առաջ, կարելի է կռահել, թե որքան մեծ գումարներ են ծախսվել Մամեդյարովի հաղթանակի համար:

Կարուանան Արոնյանից բացի մրցելու է Գրիշչուկի հետ: Առաջին տեղը գրավելու համար նրանից գերջանքեր են պահանջում: Երկու խաղում էլ նա հանգիստ կարող է պարտվել: 

Կարյակինը մրցելու է Սո Վեսլիի եւ Դինգ Լիրենի հետ: Կարելի է ասել Կարյակինի հնարավորությունները մի փոքր ավելի բարձր են քան Կարուանայինը, բայց այստեղ, վճռական խոսքը պատկանելու է Արոնյանին: Ում կօգնի Արոնյանը: Սա է հարցերի հարցը, որի պատասխանից շատ ու շատ հարցեր կստանան իրենց պատասխանները:

Ինչ վերաբերում է Մամեդյարովին, ապա նա նախ պետք է խաղա Գրիշչուկի, ապա նաեւ Կրամնիկի հետ: Կարելի է ենթադրել, որ ռուսաստանցի շախմատիստները կխաղան ոչ միայն իրենց, այլ նաեւ իրենց համերկրացի Կարյակինի հաղթանակի համար:

Գարիկ Գասպարյան

Top-News.am